Rebelo de Sousa disolve o Parlamento portugués e convoca eleccións anticipadas
Os comicios lexislativos celebraranse o 18 de maio
Marcelo Rebelo de Sousa e Luís Montenegro, durante unha xuntanza no Pazo de Belem a semana pasada (Reuters / Pedro Nunes)
O presidente de Portugal Marcelo Rebelo de Sousa asinou o decreto que marca a disolución do Parlamento e convoca eleccións lexislativas anticipadas para o 18 de maio, tras a recente caída do Goberno do conservador Luís Montenegro por unha investigación sobre unha empresa familiar fundada polo primeiro ministro.
A Presidencia da República lusa informou onte á noite nun conciso comunicado de que o xefe de Estado rubricou o documento este mércores, que entra en vigor hoxe, xoves.
Segundo a lexislación portuguesa, durante o período de disolución manterase en funcionamento a Comisión Permanente, liderada polo presidente da unicameral Asemblea da República (Parlamento) e composta polos vicepresidentes e deputados indicados por todos os partidos con asento parlamentario.
Rebelo de Sousa anunciou a semana pasada a disolución do Parlamento e a convocatoria de eleccións tras unha crise política motivada por unha polémica empresarial que provocou que o Parlamento lle retirase a confianza ao Executivo do primeiro ministro Luís Montenegro, do Partido Social Demócrata (PSD, centrodereita).
Tras o anuncio do presidente, a Asemblea celebrou o pasado venres unha longa sesión de votacións de case tres horas nas que aprobou varias iniciativas que seguían en trámite.
