O Congreso elimina a prohibición de cazar lobos ao norte do Douro e abre a porta para ampliar ao resto de España

O pleno do Congreso aprobou este xoves eliminar a protección especial das poboacións de lobo ao norte do Douro, o cal permitiría a súa caza, e abriu a porta a que poida rebaixarse esta protección tamén nas poboacións ao sur do Douro.

O lobo deixa de ser unha especie estritamente protexida e pasa a considerarse simplemente como protexida ao norte do Douro. Esta rebaixa da súa protección abre a porta á posibilidade de caza controlada. 

O Congreso deulle o visto bo a través dunha emenda aprobada no Senado e colocada na lei de desperdicio alimentario. Votaron a favor PP, PNV, Junts, UPN e Vox. Pero os de Abascal tumbaron unha das catro emendas. De momento, non se sabe con que consecuencias.  Os populares acusan o Goberno de prevaricar. 

Sindicatos coma Unións Agrarias ou Xóvenes Agricultores aplauden a decisión. 

A Xunta de Galicia puntualiza que non se trata de autorizar batidas libremente, pero si de protexer os gandeiros. 

"Protexiamos unha especie pero desprotexiamos ao gandeiro", asegurou a conselleira de Medio Ambiente e Cambio Climático, Ángeles Vázquez.

Así se expresou a responsable autonómica, que acudiu a Madrid á votación no Congreso e que recoñeceu que foi un traballo "duro e arduo", no que levan desde 2021, cando empezaron a denunciar a situación.

A este respecto, lembrou que mesmo chegaron a recorrer á Audiencia Nacional polo incremento de avisos e de mortes por ataques de lobo, cun incremento dun 57% desde 2021. "Cada día o lobo ataca. E ese ataque ten como consecuencia a morte dunha media de 10 animais, entre eles, cabalos, ovellas, cabras e vacas", remarcou.

Ángeles Vázquez mostrou o seu agradecemento a todos os deputados que "fixeron posible" que tres das catro emendas preparadas polo Partido Popular saísen adiante e lamentou que o BNG "nin sequera tivese a ben utilizar a súa quenda de palabra" - que cedeu ao grupo parlamentario de Podemos-.

"Queda demostrado que o BNG di unha cousa en Galicia e fai outra ben distinta cando lle toca velar polos intereses dos gandeiros. Aquí non se trata de desprotexer totalmente ao lobo. Do que se trata é de protexer aos nosos gandeiros, que cada vez temos menos", defendeu.

Nesta liña, tamén censurou a postura dos deputados do PSOE, especialmente a da deputada de Lugo encargada de defender o tema, á que lle reprochou "non mencionar en ningún momento ao lobo nin aos gandeiros". "E por suposto, o seu voto foi desfavorable", apuntou.

Desde agora será posible autorizar a caza con criterios científicos e técnicos en comunidades como Galicia, Asturias, Cantabria e Castela e León e non unicamente como un procedemento totalmente excepcional. Agora queda por ver a reacción do goberno, pois xa advertiu que non vai quedar de brazos cruzados 

Deste xeito, aprobouse unha emenda que modifica o real decreto que desenvolve a Listaxe de Especies Silvestres en Réxime de Protección Especial (LESPRES) e o Catálogo Español de Especies Ameazadas para limitar a inclusión, o cal impide a súa caza, exclusivamente das poboacións do lobo ao sur do Douro. Deste xeito, reverte a decisión tomada hai tres anos polo Ministerio para a Transición Ecolóxica e o Reto Demográfico (MITECO) de incluír as poboacións de lobo ao norte do Douro no LESPRES, que na práctica impedía a súa caza en todo o territorio nacional.

Ademais, aprobouse outra emenda sobre o control das especies naturais depredadoras en eficiencia do sistema produtivo. Nela, establécese que as autorizacións excepcionais para cazar lobos e calquera especie depredadora con alto impacto no sistema produtivo incluída no LESPRES poderán xustificarse na eficiencia do sistema produtivo, ademais das outras razóns xa previstas na Lei de Patrimonio Natural e da Biodiversidade.

Igualmente, a Cámara Baixa deu luz verde a unha terceira emenda, unha disposición transitoria única de adaptación á normativa europea, que establece a saída inmediata do LESPRES das poboacións de lobo ao sur do Douro no caso de que se modifique o seu réxime de protección comunitario. Así, sairían fóra do listado se pasan ao anexo de especies obxecto de medidas de xestión da Directiva Europea relativa á conservación dos hábitats naturais e da fauna e flora silvestres.