Rueda destaca a USC como emblema da identidade, o talento e a investigación galega
Nunha xuntanza coa asociación Alumni, de antigos alumnos da universidade compostelá, salientou o interese do Goberno galego pola investigación e a transferencia de coñecemento
O presidente da Xunta destacou en Madrid o papel da Universidade de Santiago como emblema da identidade, o talento e a aposta pola investigación que se fai en Galicia.
Nunha xuntanza coa asociación Alumni, de antigos alumnos da universidade compostelá, salientou o interese do Goberno galego pola investigación e a transferencia de coñecemento e lembrou que Galicia é pioneira na implantación da matrícula universitaria gratuíta.
Alfonso Rueda dixo que a USC é embaixadora do que significa a marca Galicia Calidade: "Unha vida universitaria potente constrúe unha Galicia potente, isto temos que coidalo moitísimo. Os que no seu día tomamos a decisión de estudar na USC hoxe podemos dicir con orgullo que vimos dunha universidade que nos marcou".
