Suspéndese o xuízo en Aviñón para saber o estado real de saúde do principal acusado

O xuízo en Aviñón polo caso contra Dominique Pelicot, o marido que durante anos drogaba á súa muller para que a violasen decenas de homes, quedou suspendido pouco despois de comezar para que se constitúa un equipo médico que informe o tribunal do estado real de saúde do principal acusado, ausente por enfermidade.

Roger Arata, presidente do Tribunal do Criminal de Vaucluse (sueste de Francia), anunciou esa suspensión por un tempo incerto que se supón de varias horas, para reunirse en primeiro lugar cos avogados e designar os expertos que deberán determinar se Dominique Pelicot pode asistir nos próximos días ao proceso.

Unha cuestión fundamental para a decisión que terá que tomar sobre a súa continuidade ou sobre un eventual aprazamento, por uns días ou por un período moito máis longo que suporía unha nova programación da axenda das decenas de persoas implicadas.

A avogada de Dominique Pelicot, Béatrice Zavarro, queixouse de que o seu cliente alertara das súas doenzas desde hai máis dunha semana pero non empezou a recibir tratamento máis que nas últimas horas.

Zavarro explicou á prensa, pouco antes de que comezase a vista, que se lle detectou unha pedra na vesícula e que sofre unha infección renal, e que o seu estado lle impedía acudir este luns pola mañá ao tribunal.

A letrada insistiu, como nos últimos días, en que Dominique Pelicot está impaciente por declarar, en que a súa enfermidade non é unha estratexia para impedilo, e en que ninguén quere un aprazamento longo.

Gisèle Pelicot, a vítima do que agora é o seu exmarido e doutros 49 homes que sentan no banco de acusados neste xuízo, fixo pola súa banda unha declaración para agradecer as mostras de apoio que recibiu desde hai dúas semanas e para dicir ás vítimas de violencia sexual que non están soas.