Temporal costeiro e avisos en terra por chuvia e fortes refachos de vento
Temporal costeiro e avisos en terra por chuvia e fortes refachos de vento
Todo o litoral galego está en aviso laranxa con ondas de ata sete metros de altura
Este sábado será unha xornada de transición, porque o domingo entra unha nova borrasca
Nesta xornada de temporal costeiro, as ondas intentan saír do mar. Todo o litoral galego está en aviso laranxa pola acción combinada do vento do suroeste e mar de fondo. A media das ondas podería chegar aos 7 metros de altura.
E o vento, como se ve nestas imaxes de Muxía, tamén se deixa sentir en terra.
"O vento irá a máis, sobre todo, pola tarde. En moitos puntos de Galicia imos ter refachos por riba dos 80 km/h. Xa tivemos na Mariña, esta mañá, refachos por riba dos 100 km/k", explica Carlos Otero, meteorólogo.
Unha fronte que vén activa e con moita auga: "Traerá chuvia intensa e nas provincias atlánticas pode deixar máis de 15 litros nunha hora", engade Otero.
A Xunta de Galicia informou de que a Comisión Escolar de Alertas acordou esta mañá ampliar a suspensión de actividades no exterior debido ás últimas actualizacións dos partes meteorolóxicos dos distintos organismos preditores. A chegada da borrasca Éowyn tamén provocou que dita comisión suspendese a actividade deportiva federada que se realice no exterior debido a un fenómeno meteorolóxico adverso de nivel laranxa por ventos.
A limitación rexerá, a partir das 18:00 horas, nas zonas suroeste, oeste e noroeste da Coruña. Esta suspensión súmase á xa comunicada onte para todo o día de hoxe nas zonas da Mariña de Lugo e a Montaña de Ourense. Ademais, mantense a cancelación da actividade deportiva federada no mar nos concellos afectados polo temporal costeiro en municipios da Coruña e Pontevedra.
O Goberno galego lembra a necesidade de manterse afastado da liña de costa, así como circular con precaución e informarse do estado das estradas antes de conducir.
Bos días! Hoxe vento e chuvias intensos, especialmente esta tarde, con temporal no mar.
— MeteoGalicia (@MeteoGalicia) January 24, 2025
Mañá sábado, só avisos no mar por ondas
Domingo de novo de temporal no mar e chuvia e ventos fortes.
⚠️Actualización avisos:
🟠https://t.co/nUMmpXhN9l
🟠https://t.co/IuJyatp2K4 pic.twitter.com/vFI4Zf2y80
Durante a madrugada vai amainar e este sábado vai ser unha xornada de transición, porque o domingo chega outra profunda borrasca que vai deixar outro temporal en Galicia.
