Trump anunciará a vindeira semana novos aranceis a varios países
Di que busca equiparar os gravames que eses países aplican ás exportacións estadounidenses
Donald Trump co Primeiro Ministro xaponés Shigeru Ishiba. Reuters/Kent Nishimura
O presidente dos Estados Unidos, Donald Trump, adiantou este venres que a próxima semana anunciará a imposición de aranceis a varios países, unha medida que busca equiparar os gravames que estes aplican ás exportacións estadounidenses e que aviva a incerteza sobre unha posible guerra comercial.
"A semana próxima anunciarei aranceis recíprocos, para que se nos trate en igualdade de condicións con outros países. Non queremos máis nin menos. Así que o anunciarei a próxima semana, xunto con moitas outras cousas", dixo en declaracións á prensa no Despacho Oval, onde se reuniu co primeiro ministro xaponés, Shigeru Ishiba.
"Falarei sobre comercio recíproco a próxima semana, teremos unha conferencia de prensa e explicarémolo de maneira bastante simple", agregou o líder republicano.
Trump anunciou aranceis do 25 % para México e Canadá, os seus veciños e principais socios comerciais, para o 4 de febreiro, pero atrasou un mes a súa imposición despois de que eses países accedesen a aumentar o control fronteirizo para reducir o tráfico de fentanilo e a chegada de migrantes a Estados Unidos.
México aceptou enviar 10.000 efectivos da Garda Nacional á fronteira cos Estados Unidos como parte do acordo e Canadá nomeou un "tsar do fentanilo" e designou aos cárteles do narcotráfico como organizacións terroristas.
Trump si cumpriu a imposición dun arancel adicional do 10 % para China, que o xigante asiático respondeu con gravames similares.
Desde que chegou á Casa Branca o 20 de xaneiro, o republicano utilizou as ameazas arancelarias como ferramenta de presión contra outros países, a pesar de que os economistas advirten de que este tipo de medidas podería xerar unha subida de prezos dentro dos Estados Unidos.
Dúas semanas atrás, Trump ameazou con aranceis sobre Colombia para forzar ao país para aceptar a deportación de migrantes colombianos despois de que o seu presidente, Gustavo Petro, desautorizase a chegada ao país de dous voos de deportación polas malas condicións nas que viaxaban.
