Trump apóiase en Musk e en X para impulsar a súa campaña electoral

O expresidente estadounidense e candidato republicano Donald Trump utilizou este luns a rede social X (antes Twitter) para impulsar a súa campaña electoral cunha conversación en directo co magnate, e propietario da proia rede, Elon Musk que lle permitiu profundar nas súas críticas aos demócratas e á situación do país.

O encontro, que xerara grande expectación, comezou cuns 45 minutos de atraso. Musk alegou que a súa plataforma parecía sufrir un ataque de denegación de servizo, coñecido como DDOS, e que estaban a traballar para contelo.

X asegurou que probara o seu sistema con oito millóns de oíntes simultáneos e a conversación foi seguida finalmente por uns 1,3 millóns de persoas. "Felicidades. Págaseme por isto?", díxolle Trump ante o elevado interese espertado.

Musk prometera que o seu intercambio non ía ter nin guión nin límites, pero incidiu en temas que lle resultan cómodos ao exmandatario, como a "inmigración ilegal" que, segundo este último, "salvoulle a vida" o pasado 13 de xullo, cando foi obxecto dun intento de asasinato.

O ataque tivo lugar durante un mitin en Butler (Pensilvania). Un mozo de 20 anos, abatido despois polos axentes, disparou a Trump desde un tellado que estaba fóra do recinto e conseguiu matar a unha persoa do público e ferir a outras dúas.

Xusto antes de ser alcanzado na orella o expresidente conservador virou a súa cabeza para mostrar á xente un gráfico que apuntaba segundo as súas cifras a un descenso significativo da caída da chegada de inmigración ilegal durante o seu mandato. "Vou durmir sempre con el", chanceou este luns.

A conversación produciuse nun momento en que a vicepresidenta e candidata demócrata, Kamala Harris, adianta a Trump nas intencións de voto. Segundo a media elaborada pola web FiveThirtyEight, supéralle por 2,8 puntos cunha porcentaxe do 46,1 %.

"Se votas por ela, deberías facerte mirar a cabeza", dixo Trump, mentres que Musk considerou que os demócratas están "a reescribir a historia" facendo pasar á candidata demócrata por unha persoa "moderada".

Musk manifestou publicamente o pasado xullo que apoiaba a Trump nas eleccións e fíxoo a pesar de que, segundo apuntou el mesmo este luns, considérase a si mesmo historicamente un "demócrata moderado". "Pero estamos realmente ante un punto de inflexión crítico para o país. (...) Ti es o camiño da prosperidade para Estados Unidos e Kamala é o contrario", sostivo.

E nesa liña animou aos electores para votar tamén por Trump o próximo 5 de novembro, un favor que o conservador lle agradeceu apuntando que é unha "honra" ter o respaldo de alguén a quen sempre situara á esquerda.

En total o seu intercambio durou dúas horas. Un intercambio sen imaxe pero que, co apoio de Musk, Trump transformou en mitin dixital para lanzar os seus reproches habituais ao bando demócrata e defender o seu propio legado.

"Isto trátase de moito máis que de min ou da miña vida. Imos salvar este país. O país está a irse a pique e esta xente é mala e mentireira. (...) Din que van fortalecer a fronteira e foron os peores na historia", dixo Trump antes de que Musk reforzase a súa postura subliñando que os feitos, na súa opinión, "falan por si mesmos".

A súa conversación produciuse o mesmo día en que Trump volveu publicar en X e en que a UE lle lembrou a Musk que non está exento de cumprir coa lei e avisoulle de que Bruxelas vixía posibles riscos na Unión Europea pola publicación de contido que incita ao odio.

Xusto despois de que acabase, Trump subliñou nun correo que a súa mensaxe para todos os estadounidenses é que coa súa chegada ao poder conseguirá que os Estados Unidos volvan ser ricos, seguros e grandes de novo, despois de que a economía do país estea agora "feita cachizas", a fronteira "aberta" e o crime "sen control".

O equipo de Harris e do seu número dous, o gobernador Tim Walz, non tardou en reaccionar: "Toda a campaña de Trump está ao servizo de persoas como Elon Musk e el mesmo: tipos ricos obsesionados consigo mesmos que venderán á clase media e que non poden nin realizar unha transmisión en directo no ano 2024", concluíron con sorna.