Trump esixe a Rusia que deteña os bombardeos a Ucraína: "Vladimir, BASTA!"

O presidente dos Estados Unidos, Donald Trump, advertiu este xoves de que está descontento cos bombardeos rusos sobre Ucraína e esixiu ao seu homólogo ruso, Vladímir Putin, que os deteña.

"Non estou contento cos ataques rusos a Kíiv. Innecesarios e nun mal momento. Vladimir, BASTA!", escribiu o mandatario republicano na súa rede Truth Social.

"Morren 5.000 soldados á semana. Consigamos o acordo de paz!", agregou Trump na súa mensaxe.

O mandatario estadounidense condenou desta forma o ataque ruso con mísiles e drons lanzado este xoves contra Kíiv, un dos máis graves dos últimos meses.

Desde que Trump regresou ao poder en xaneiro coa promesa de poñer fin á guerra de Ucraína, foron poucas as mostras de frustración cara ao bando ruso como a deste xoves, en comparación coas críticas constantes ao presidente ucraíno, Volodímir Zelenski.

Na véspera deste último ataque, o republicano volveu acusar a Zelenski de poñer trabas ás negociacións de paz pola súa negativa tallante a recoñecer como territorio ruso á península de Crimea, ocupada desde 2014.

Segundo medios de comunicación estadounidenses, este recoñecemento sería unha das esixencias que a Casa Branca fixo a Ucraína dentro da súa proposta de plan de paz. 

Unha data límite para o acordo de paz

Trump, dixo este xoves que a súa data límite para alcanzar un acordo de paz entre Ucraína e Rusia chegará pronto.

"Teño a miña propia data límite e queremos que sexa rápida", declarou ao ser preguntado pola prensa durante un xantar de traballo na co primeiro ministro noruegués, Jonas Gahr Store, na Casa Branca.

"Cremos firmemente que ambos queren a paz, pero teñen que sentar á mesa. Levamos moito tempo esperando", afirmou o mandatario,

Trump non respondeu á pregunta de se pensa impoñer novas sancións a Rusia se persisten os bombardeos.