Persoas sen fogar, migrantes, transexuais e presos acompañarán o féretro do papa Francisco
Portarán rosas brancas como símbolo de agradecemento polo seu legado de proximidade cos máis vulnerables
Un grupo de arredor de 40 persoas pobres, sen fogar, migrantes, transexuais e presos acompañará o féretro do papa Francisco nos seus últimos momentos antes do enterro. Estarán situadas na escalinata da basílica papal de Santa María a Maior, o lugar escollido polo propio pontífice para ser sepultado, como mostra do seu compromiso cos máis necesitados.
Segundo informou o Vaticano, este xesto subliña a profunda proximidade de Francisco coas persoas marxinadas.
"Os pobres teñen un lugar especial no corazón de Deus. Tamén o tiñan no corazón e no maxisterio do Santo Padre, que escolleu o nome de Francisco para non esquecelos nunca", sinalaron desde a Santa Sé.
Un adeus simbólico con rosas brancas
Cada unha destas persoas levará unha rosa branca na man. Reuniranse o sábado 26 de abril pola mañá nas escaleiras da basílica, onde despedirán e agradecerán ao papa o seu compromiso e afecto.
Para elas, os "últimos" da sociedade, será un privilexio ser os últimos en dicirlle adeus antes do enterro, que terá lugar entre a Capela Paulina e a Capela Sforza da mesma basílica, tras o funeral na praza de San Pedro.
A iniciativa xurdiu tras unha conversa entre Benoni Ambarus, coñecido como Don Ben, e o mestre das Celebracións Litúrxicas Pontificias, monseñor Diego Ravelli.
Ambarus é secretario da Comisión para as Migracións da Conferencia Episcopal Italiana e delegado para a caridade. A proposta buscaba dar valor á presenza dos pobres nos funerais, representando diversos colectivos vulnerables.
"É unha decisión conmovedora. O Santo Padre será recibido pola Nai que tanto amou e polos seus fillos queridos, que o acompañarán nos seus últimos pasos. É algo verdadeiramente fermoso", afirmou Don Ben.
Entre as persoas presentes haberá presos de Rebibbia, migrantes, sen teito e unha pequena representación de transexuais acompañadas por unha comunidade relixiosa. Moitas destas persoas coñeceron persoalmente o papa Francisco durante o seu pontificado. Un exemplo é unha muller transexual que asinou o seu primeiro contrato de traballo grazas ao apoio de Cáritas.
Segundo Ambarus, "recibiranos cunha rosa branca, todos. Con ese xesto dinlle: benvido á casa, porque vai á Casa do Pai, e tamén grazas por todo o que fixeches por nós. Son os fillos que despiden o pai".
