Trump promete “acordos xustos” aos países que negocien os aranceis, pero descarta unha pausa

O presidente dos Estados Unidos, Donald Trump, asegurou este luns que haberá “acordos xustos” cos países que están a negociar os aranceis, pero descartou por completo unha pausa na súa política de gravames.

Nunha reunión no Despacho Oval da Casa Branca co primeiro ministro israelí, Benjamin Netanyahu, Trump afirmou: “Non o estamos a considerar. Hai moitísimos países que están a vir negociar acordos connosco, e serán acordos xustos”.

Trump anunciou o pasado 2 de abril aranceis globais do 10 %, que entraron en vigor o pasado sábado, e outras taxas superiores que comezarán a aplicarse o día 9 a rexións e países como China e a Unión Europea (UE).

O mandatario subliñou que os Estados Unidos buscan agora acordos comerciais que sexan realmente beneficiosos para o país.

“Isto é ‘Estados Unidos primeiro’. Agora si que é ‘Estados Unidos primeiro’.

No pasado non foi así, e non o vou tolerar máis”, dixo Trump.

Tamén destacou que mantivo este luns pola mañá unha “moi boa conversa” co primeiro ministro xaponés, Shigeru Ishiba, na que trataron esta cuestión.

“Imos conseguir acordos xustos e bos tratos con todos os países. E se non os conseguimos, non teremos nada que ver con eles”, engadiu.

Ao tempo, recoñeceu que poden existir aranceis permanentes mentres continúan as negociacións.