O TSXG avala o dereito dos homes a asistir a técnicas de preparación ao parto

O Tribunal Superior de Xustiza de Galicia avalou, por primeira vez, o dereito dos traballadores homes a dispoñer de permisos para asistir a técnicas de preparación ao parto ao considerar que se estes só fosen femininos, o dereito sería "discriminatorio por razón de sexo".

Nunha sentenza do 7 de novembro difundida polo TSXG, a sala do social do tribunal confirmou unha sentenza dun xulgado de Vigo que daba a razón a un demandante deste dereito, representante legal do persoal dunha empresa.

Exames prenatais

Con todo, a resolución xudicial confirmada non lles recoñece aos homes o permiso para acudir a exames prenatais, tamén solicitado polo demandante.

Considera "acertado" o criterio de primeira instancia de non estender este permiso aos traballadores homes e demais persoas proxenitoras que non son xestantes.

A Xustiza considera que ambos os permisos son, na súa orixe, na Lei de prevención de riscos laborais de 1995, exclusivamente femininos, pero relata que “a evolución normativa, xurisprudencial e doutrinal acaecida desde entón” fai concluír que o permiso para técnicas de preparación ao parto “debe ser estendido aos traballadores homes".

Sostén que se non fose así, "sería discriminatorio por razón de sexo, en aplicación da doutrina contida na sentenza do Tribunal de Xustiza da Unión Europea.

A resolución non é firme, pois cabe presentar recurso ante o Tribunal Supremo.