Gonzalo Pérez Jácome substitúe as conferencias de prensa por directos en Youtube

O alcalde de Ourense, Gonzalo Pérez Jácome, da formación Democracia Ourensá, anunciou a eliminación das conferencias de prensa "tradicionais" con xornalistas. Serán substituídas por comparecencias "informativas" a través da canle de Youtube de Auria Televisión, de carácter local e da súa propiedade.

O rexedor xustificou a súa decisión por redes sociais, alegando que as comparecencias con xornalistas "só servían para que adulterasen as informacións".  Un día despois da primeira emisión, esta case acumula 900 visualizacións.

O alcalde sinalou na primeira intervención de onte, martes, que "a verdade non necesita intermediarios, e por iso o que facemos nós é dirixirnos directamente aos cidadáns". Nesta primeira comparecencia presentou a programación do Nadal e habilitou un número de teléfono móbil para que as persoas poidan facer preguntas vía WhatsApp durante a emisión. 

Este mércores volveu defender o formato porque "as novas tecnoloxías forzaron moitos intermediarios a adaptarse" e "os xornalistas non só non se adaptan, senón que queren ser declarados, oficialmente, únicos garantes da verdade". O espazo empregado para estas retransmisións é o salón de plenos do Concello.

Jácome afirma que esta decisión débese á "manipulación mediática que arrasa o mundo" e que, na súa opinión, en Ourense alcanza un "grao de caciquismo nunca visto". Do mesmo xeito, atribúe este fenómeno "á inxerencia das administracións públicas en todos os medios de comunicación". 

Facer fronte a Jácome

Fronte a esta decisión, o PPdeG pediu transparencia, mentres que o PSdeG e BNG aseguraron que esta medida atenta contra o dereito á información. A portavoz do PSdeG en Ourense, Natalia González, advertiu que non convocar os medios representa "un ataque aos dereitos da cidadanía e ao labor dos xornalistas", ademais de ser "un intento máis de distraer a atención do realmente importante, e unha oportunidade para presentarse como vítima daqueles medios de comunicación cos que non comparte liña editorial".

Pola súa parte, o Colexio Profesional de Xornalistas de Galicia lembrou que as preguntas dos xornalistas "son o que fiscaliza a comunicación dos cargos políticos, para que o que chegue á cidadanía sexa información e non propaganda".

A Asociación de Xornalistas de Galicia, un grupo que agrupa profesionais deste colectivo, censurou o sistema desenvolvido por Jácome para evitar "responder as preguntas directas dos xornalistas" e afirmou que este formato "lesiona gravemente o dereito dos cidadáns para recibir unha información libre e independente, non condicionada por intereses persoais ou partidistas”.