Pais e nais galegos benefícianse de 192 obradoiros para poder ter os nenos atendidos no verán

Obradoiros coma este están organizados polos concellos, pero reciben unha subvención da Xunta de Galicia. Permiten que pais e nais poidan compaxinar mellor a súa vida laboral co coidado dos pequenos, especialmente nestes meses en que estamos en período non lectivo.

"Imos por semanas a cada parroquia, seis en total. O horario de entrada é de 9 a 10 e a saída entre as 13 e as 14 horas", explica Cuqui García, monitora do Obradoiro de Verán de Sanxenxo. 

Son obradoiros que organizan algúns concellos para que os nenos estean atendidos e entretidos, e poidan sacar proveito das súas vacacións cando os pais teñen que volver traballar. 

"É moi necesario nun concello como o noso, que no verán atrae moitos traballadores e que non terían onde deixar os nenos", engade Telmo Martín, alcalde de Sanxenxo. 

Este mércores, as autoridades municipais falaron da necesidade crecente destes servizos. Oferta municipal que podería ampliar horarios. A Xunta estudará ampliar as subvencións con este propósito.

 "A Xunta de Galicia xa achegou este ano 17 millóns de euros en programas de corresponsabilidade e pensamos que ese é o camiño. Apoiar as familias para que poidan seguir coa súa vida laboral, e tamén o seu lecer, e apoialos coa axuda das administracións", declarou Elena Rivo, a conselleira de Igualdade.

A idea é estender a oferta para o ano que vén, para os meses de xullo e agosto, en horario de oito a tres.