Ano de éxito galego nas Olimpíadas e do adeus de Gómez Noya

O pasado mes de agosto, a piragüista canguesa Teresa Portela agrandou a súa lenda coa súa sétima participación olímpica en París. Aos seus 42 anos, é a primeira deportista española en chegar tan lonxe e non esconde que soña con ir aos Ánxeles 2028. Así e todo, tampouco se obsesiona co futuro e vive no presente cun fantástico palmarés: prata en Tokyo 2020, 17 medallas mundiais e outras tantas a nivel europeo.

Ao mes seguinte, en setembro, o mellor triatleta da historia, Javi Gómez Noya, anunciou a súa retirada. O deportista galego déixao cun palmarés impoñente: cinco títulos mundiais, catro de Europa, dous Mundiais de IM 70.3 e unha prata olímpica en Londres 2012.

Son, sen dúbida, dous dos acontecementos deportivos do ano 2024, pero non os únicos, xa que, por exemplo, Galicia regresou da capital francesa con once medallas entre os Xogos Olímpicos e Paralímpicos.

Galicia nas Olimpíadas

Os piragüistas Rodrigo Germade e Carlos Arévalo, integrantes do K4 500, o porteiro de balonmán Rodrigo Corrales e o boxeador Emmanuel Reyes triunfaron en París. Tamén o fixeron o padeeiro Diego Domínguez e o judoka Francisco Garrigós, quen naceron en Madrid pero residen en Galicia.

Nos Xogos Paralímpicos, Susana Rodríguez Gacio e Juan Antonio Saavedra repetiron éxito. Outros como Martín da Puente, Judith Rodríguez e Damián Ramos lograron a súa primeira medalla olímpica.

Giráldez revitaliza o Celta

A irrupción de Claudio Giráldez no primeiro equipo do Celta, tras o fracaso que supuxo o paso de Rafa Benítez, devolveu a ilusión ao celtismo, cunha decidida aposta pola canteira, un fútbol ofensivo e o rexurdir dun Iago Aspas que perdera a ilusión co técnico madrileño no banco de Balaídos.

En Vigo, o equipo e a súa afección viven a súa etapa de maior esplendor, con Balaídos enchéndose cada fin de semana que o seu equipo xoga como local, onde unicamente o Atlético de Madrid e o Real Madrid lograron tombar ao Celta de Giráldez.

Dobre ascenso do Deportivo

O deportivismo coruñés celebrou a finais do pasado mes de maio o ansiado regreso do seu equipo ao fútbol profesional despois de catro tempadas no pozo de Segunda División. Fíxoo, ademais, cun gol de Lucas Pérez.

O salto de categoría aumentou a presión sobre o técnico Imanol Idiakez, quen apenas aguantou doce xornadas no cargo. Seguindo o modelo do Celta, o Dépor apostou por ascender ao primeiro equipo ao técnico do filial Óscar Gilsanz, quen foi capaz de endereitar o rumbo dun equipo que despide o 2024 con tres puntos por encima da zona de descenso.

O Deportivo pecha un ano de festexos porque a ese éxito súmase o do equipo feminino, de volta á máxima categoría do fútbol español. Conseguiuno baixo a dirección de Irene Ferreras, destituída a finais de novembro.

Todo aberto na Primeira Federación

Un chanzo máis abaixo, en Primeira Federación, a vida segue igual para o CD Lugo, incapaz de engancharse á liorta polo ascenso directo.

O equipo albivermello é décimo segundo, a cinco puntos do Andorra, que pecha os postos de playoff de ascenso. Arenteiro e Celta Fortuna tamén soñan con entrar nesa zona de privilexio, mentres que o Ourense, reactivado tras o cambio de adestrador, ten como único reto a salvación.

Louzan chega á Federación Española

Outra das grandes noticias para o fútbol galego foi a proclamación de Rafael Louzán como presidente da Federación Española.

A condena a sete anos de inhabilitación para ocupar cargo público que recae sobre el por prevaricar coa subvención para a remodelación dun campo de fútbol en Moraña (Pontevedra) é o último obstáculo que deberá superar para asentarse en Madrid.

Os feitos sucederon cando Louzán presidía a Deputación pontevedresa baixo as siglas do Partido Popular. Se o Supremo ratifica a condena, o Goberno de Pedro Sánchez xa deixou entrever unha posible intervención do Consello Superior de Deportes (CSD) para tratar de inhabilitalo.

Ano de ascensos e descensos en todas as disciplinas

O 2024 tamén será lembrado polo histórico ascenso do Básquet Coruña á ACB, en que se estreou cunha épica vitoria contra o Real Madrid. En maio, o baloncesto galego soñou con ter tres equipos na máxima categoría. Evitouno o triunfo do Granada no partido contra a Gran Canaria na última xornada da fase regular.

Esa vitoria nazarí acabou consumando o traumático descenso do Monbus Obradoiro. Por un só punto, o equipo picheleiro caeu á categoría de prata. Foi, ademais, o fin de ciclo da era Moncho Fernández no Multiúsos Fontes do Sar.

O descenso chegou a tempada do debut europeo –fase previa da liga de Campións-, curiosamente o ano no que o Río Breogán tamén regresou a unha competición continental.

En Europa tamén se estreou este ano o Club Balonmán Porriño. A espectacular tempada que asinou o equipo de Isma Martínez no pasado curso concedeulle un billete para a EHF European Cup, na que segue vivo tras eliminar ao SSV Brixen Tirol, equipo italiano, e ao Bursa, procedente de Turquía.

Outra das grandes noticias deuna o Frigoríficos do Morrazo no balonmán. O equipo de Nacho Moyano esnaquizou ao San Pablo Burgos na promoción de permanencia para certificar a súa continuidade na liga Asobal, categoría á que non puido regresar o Cisne tras caer na primeira eliminatoria polo ascenso. A iso uniuse unha nova clasificación para a fase final da Copa do Rey.

Pola contra en Ferrol non hai tanta alegría. O Rácing pechou o 2023 en postos de ascenso a Primeira División e un ano despois atópase afundido na zona de descenso, a cinco puntos da salvación e con Cristóbal Parralo ratificado polo consello de administración.

A profunda renovación que sufriu o cadro de racinguista dinamitou a un equipo que carece de gol. Carlos Mouriz, director deportivo, xa traballa na procura de xogadores. O racinguismo soña co regreso de Nico Serrano e Iker Losada.

Burela FS en crise

Pero non todo foron boas noticias. A principios de decembro, o Burela FS anunciou que Pescados Rubén, o seu sustento económico, deixaba de patrocinar aos seus equipos ao finalizar o presente campionato pola súa delicada situación financeira.

Unha noticia que chegou meses despois de que o equipo feminino lograse o seu sexto título de Liga e o masculino o ansiado ascenso a Primeira División. O futuro do club é unha incógnita, pero a directiva xa traballa na procura dun novo patrocinador. A sombra do Autos Lobelle e o Azkar Lugo é unha ameaza.