A China nin está de acordo nin acepta os aranceis da UE aos seus vehículos eléctricos

As autoridades da China aseguraron este mércores que nin están de acordo nin aceptan a decisión da Unión Europea (UE) de aplicar, a partir de hoxe, aranceis adicionais de ata un 35,3 % aos vehículos eléctricos importados desde o país asiático.

O Ministerio chinés de Comercio lembrou nun comunicado que presentou un recurso ante o mecanismo de resolución de disputas da Organización Mundial do Comercio (OMC): "A China seguirá tomando todas as medidas necesarias para protexer de maneira determinada os dereitos e intereses lexítimos das empresas chinesas".

En agosto, as autoridades do país asiático iniciaron un proceso de resolución de disputas ante a OMC ao considerar que a iniciativa da UE "infrinxía gravemente" as normativas dese organismo e carecía "de base obxectiva e legal".

Aínda que o portavoz de Comercio incidiu hoxe en que a investigación antisubvencións da UE "ten moitos aspectos desproporcionados" e é unha "mostra de proteccionismo", tamén reiterou a vontade de Pequín de seguir negociando para "alcanzar unha solución aceptable para ambas as partes canto antes".

"A China sempre apostou pola resolución de disputas comerciais a través do diálogo e a consulta, e vén facendo todo o posible a este respecto. Actualmente, os equipos técnicos de ambas as partes están a celebrar unha nova rolda de negociacións", apunta o comunicado.

"Esperamos que a UE traballe coa China de forma construtiva, seguindo os principios de pragmatismo e equilibrio, atendendo as preocupacións clave do outro (...) e evitando un agravamento das friccións comerciais", exhortou o voceiro.