A Escola de Enxeñería de Telecomunicaciónsde Vigo lidera dez proxectos de intelixencia artificial

Imaxinan que cos seus propios teléfonos móbiles puidesen detectar se teñen algún problema psicolóxico? Ou que os seus dispositivos alerten precozmente cos seus familiares dos primeiros síntomas de demencia senil? Semella ciencia ficción, pero son proxectos que xa están en marcha na Escola de Enxeñeiros de Telecomunicacións de Vigo. Investigacións de intelixencia artificial que resultan cando menos tan asombrosas como o novo Chat GPT.

"Semella que falamos de sociedades medio futuristas, pero que en realidade xa podemos case ver que se poderían ter aquí. Pero faltaría a intelixencia transversal, esa que temos os humanos que somos quen de mesturar unha morea de coñecementos de diferentes eidos e traballar de xeito lóxico", di Rebeca Díaz Redondo, a catedrática que dirixe da Escola de Enxeñería de Telecomunicacións de Vigo. 

Entre os dez proxectos, financiados alguns pola Fecyt, da Fundación de Ciencia e Tecnoloxía, está un dicionario que pode analizar espontaneamente o significado dun signo da linguaxe coa que se comunican as persoas xordomudas. Non existe ningún así no mundo e pensaron que era importante axudar primeiro a comunicar unha doenza.

 "No ámbito da saúde precisan levar sempre un intérprete e precísanse moitos máis. Pensamos que se a tecnoloxía permite ter tradutores de calquera lingua falada, por que non tamén de linguaxe de signos", declarou José Luis Alba, catedrático do proxecto de linguaxe de signos. 

Celia non é unha simple asistente de conversa porque ao tempo que parola con nós, pode descubrir se temos algún problema cognitivo. Naceu tamén na Escola de Enxeñería de Telecomunicación de Vigo para detectar indicios de demencia senil da man dun grupo de investigación que, nun ano, terán lista para transferir esta nova ferramenta de intelixencia artificial.

"O que permite que un profesional da sanidade ou mesmo un familiar autorizado poda ver alertas, para ver se a persoa está entendendo a noticia", engade Francisco Javier González, investigador principal do proxecto Celia. 

De xeito similar, e en colaboración coa Facultade de Psicoloxía de Santiago, outro equipo deseña unha app para detectar o estado psíquico dos adolescentes, problemas de conduta ou emocionais. Ambas ferramentas tentan superar o denominado nesgo da bata branca ou, o que é o mesmo, o disimulo do que sabe que está sendo analizado por un profesional da saúde. 

Son só algúns dos proxectos que son posibles grazas ao notable incremento da velocidade de computación, que está revolucionando as tecnoloxías de procesamento da linguaxe.