A guerra en Ucraína fai 1.000 días, entre a incerteza polos próximos movementos internacionais

Mil días despois do inicio da invasión rusa, Ucraína mantén a determinación de seguir loitando, a pesar da crecente incerteza sobre o futuro apoio dos seus aliados e dunha intensa presión militar por parte de Moscova.

O presidente de Ucraína, Volodimir Zelenski, dixo este martes ante o Parlamento Europeo (PE) que Ucraína e os seus socios occidentais fixeron moito xuntos contra a invasión rusa pero non deben "ter medo a facer aínda máis" ante novos retos como as tropas norcoreanas nas fronteiras ucraínas.

"Mentres certos líderes europeos pensan sobre (como gañar) as súas eleccións á conta de Ucraína, Putin está centrado en gañar esta guerra. Non parará por si só e canto máis tempo teña, peores serán as condicións", dixo ante o pleno do Parlamento Europeo, que conmemorou hoxe nunha sesión extraordinaria os mil días desde o inicio da invasión rusa de Ucraína.

"Saben moi ben que Putin non valora ás persoas nin as normas. Só valora o diñeiro e o poder. Iso é o que temos que quitar para restaurar a paz", recalcou.

Advertiu tamén "a quen pensa que pode vender a calquera país como Ucraína, Xeorxia ou Moldavia e sacar algo a cambio" de que "ninguén pode gozar de augas tranquilas en metade dunha tormenta", polo que a paz que se logre ten que ser xusta para Ucraína, afirmou Zelenski.

España comprométese axudar a Ucraína o tempo necesario

O Goberno español reafirmouse este martes no seu apoio "incondicional" a Ucraína cando se fan mil días da invasión de Rusia, que seguirá prestando "o tempo que sexa necesario" en coordinación cos seus socios, e volveu condenar a "ilegal e inxustificada" agresión de Moscova.

O Ministerio de Asuntos Exteriores, a través dun comunicado, recalcou o compromiso de España desde o comezo dos ataques, o 24 de febreiro de 2022, ao proporcionar apoio a Ucraína en todos os ámbitos: diplomático, militar, humanitario e económico, e para a reconstrución.

"Seguirao facendo durante o tempo que sexa necesario, de forma conxunta e coordinada cos demais países da Unión Europea e o resto de socios e aliados", sinala a nota.