Biden autoriza a Ucraína ataques en territorio ruso con mísiles dos EUA

O presidente Joe Biden autorizou a Ucraína a usar armas estadounidenses de longo alcance para ataques limitados dentro de territorio ruso, asegura o diario The Washington Post citando  dous altos funcionarios do seu Goberno.

Ata o momento, nin a Casa Branca nin o Pentágono o confirmaron. Tampouco o fixo o goberno ucraíno de Volodímir Zelenski.

Segundo as fontes do diario, é unha resposta ao envío a Ucraína de milleiros de soldados norcoreanos para sumarse ás forzas rusas que tratan de retomar o control do territorio capturado polas tropas ucraínas na rexión de Kursk.

As armas autorizadas son mísiles supersónicos guiados, chamados ATACMS, que poden transportar cabezas convencionais ou de acio, e teñen un alcance dunhas 190 millas ou 300 quilómetros.

Son as que leva pedindo meses o goberno de Zelenski, co argumento de que só unhas armas así poden degradar a capacidade militar rusa e darlle a Ucraína una certa vantaxe sobre o terreo.

Gran lombeirada

De confirmárense, a decisión de Biden pode significar unha gran respaldo a Kíiv xusto antes de abandonar a Casa Branca para lle dar paso en xaneiro a Donald Trump, que prometeu repetidamente acabar con esa guerra.

Aínda que non o precisou expresamente, hai temor a que Trump estea a propiciar un acordo co presidente ruso Vladímir Putin que inclúa a renuncia de Ucraína a parte do seu territorio hoxe ocupado por tropas rusas.

No caso de que o presidente electo impulse unhas negociacións con Moscova xa nos próximos meses, a entrada na guerra de mísiles de longo alcance podería reforzar polo menos a posición de Ucraína nunha futura mesa negociadora, apunta o rotativo.

Biden no Museo da Amazonía, en Manaus, este domingo. REUTERS/Leah Millis