A nova aplicación da Seguridade Social permite darse de alta como autónomo ou ver a vida laboral

A Seguridade Social lanzou unha nova aplicación móbil que permite, entre outros trámites, darse de alta como autónomo, obter a vida laboral, actualizar datos ou ter toda a información sobre a cotización das prácticas formativas.

A aplicación, presentada este luns pola ministra de Inclusión, Seguridade Social e Migracións, Elma Saiz, incorpora todos os trámites que xa están dispoñibles na web Import@ss e engade novas funcionalidades como recibir avisos ou descargar documentos e telos gardados no dispositivo.

A web de Import@ss, lembraron desde a Seguridade Social, acumulou o ano pasado 35,6 millóns de visitas e no que vai de 2024 suma 24,4 millóns.

Saiz destacou na presentación que esta ferramenta non busca substituír a atención personalizada, senón "achegar e sumar" con especial foco nos mozos. Tamén insistiron en que o persoal da Seguridade Social non se ve afectado, senón que se busca que teñan os mellores instrumentos para dar atención ás demandas dos cidadáns.

Os sindicatos CSIF, CCOO e CIG iniciaron este mes un calendario de mobilizacións no ámbito da Seguridade Social, en todo o territorio nacional, ante "o incremento da carga de traballo e as difíciles condicións laborais para prestar un servizo adecuado aos cidadáns".

Mozos, autónomos, artistas e emprego de fogar

A aplicación ofrece catro perfiles diferentes para relacionarse: autónomos, emprego de fogar (tanto para empregadas como para empregadores), artistas e alumnos en prácticas. Neste último punto, permítese que cada estudante poida acceder ao seu perfil persoal, consultar unha guía para resolver dúbidas ou realizar trámites como solicitar o número da Seguridade Social, descargar do informe de vida laboral ou o de bases de cotización.

No caso dos autónomos, pódense tramitar altas e baixas, modificar a base de cotización, consultar recibos ou simular cotas; mentres que no emprego de fogar tamén se facilita as altas e baixas, actualizar o salario e xornada da persoa empregada ou consultar os recibos emitidos, entre outros. Para o colectivo de artistas ofrécese o poder xestionar a situación de inactividade, solicitar a devolución de ingresos por bases cotizada ou pedir a baixa no censo de artistas.