A número dous do PSOE de Madrid desvincula a Moncloa da filtración sobre a parella de Ayuso

A exasesora da Moncloa Pilar Sánchez Acera, actual número dous do PSOE de Madrid, asegurou este mércores ante o xuíz que o correo no que a parella da presidenta da Comunidade de Madrid Isabel Díaz Ayuso recoñecía cometer delitos fiscais non lle chegou a través do fiscal xeral do Estado Álvaro García Ortiz e que non recibiu instrucións da Moncloa.

Segundo informaron fontes xurídicas, a exasesora da Moncloa pronunciouse así ante o xuíz do Supremo que investiga o fiscal xeral por un suposto delito de revelación de segredos pola filtración de datos da investigación contra Alberto González Amador por fraude á Facenda.

O seu nome apareceu na causa tras a análise do móbil do exsecretario xeral do PSOE de Madrid Juan Lobato. Ela envioulle o correo do 2 de febreiro de 2024 no que o avogado do noivo de Isabel Díaz Ayuso recoñecía no seu nome ao fiscal a comisión de "dous delitos contra a Facenda Pública", para a súa intervención na Asemblea de Madrid.

A que fora asesora da Moncloa declarou que recibiu unha captura de pantalla, non o correo, en que González Amador recoñecía estes delitos e non se vía nin o remitente nin no destinatario, xa que viñan tachados.

Así, dixo que esta información non lle chegou do fiscal, nin da Fiscalía nin da Moncloa, senón a través de xornalistas que cobren a política autonómica madrileña. Con todo, non precisou que persoa en concreto lle enviou ese documento, que ela recibiu por WhatsApp.

E engadiu que ela esa captura enviouna, en calidade naquel momento de número tres da executiva socialista madrileña, a quen era entón secretario xeral do partido na comunidade autónoma, Juan Lobato, e só a el.

Ademais, recoñeceu que cambiou de móbil e que non conserva as súas mensaxes. Outras fontes explican que Sánchez Acera cambiou de terminal por seguridade, e que un técnico do Ministerio de Transformación Dixital, onde se foi con Óscar López, borroulle todas as mensaxes ao pasar dun teléfono a outro, por iso non lembra quen lle mandou o pantallazo.

Nun momento do interrogatorio, Sánchez Acera insinuou que esa información tamén a podía sacar outro partido, como Más Madrid.

Tamén asegurou que non houbo ningún plan para difundir esta información co fin de desprestixiar a Ayuso, nin se comentou nas reunións pola mañá.

O xuíz citouna porque consideraba que pode ser útil "coñecer o percorrido que puido ter o correo" do 2 de febreiro de 2024 "ata a súa aparición na mañá do día 14 de marzo no dixital elplural.com, e en que circunstancia circulou a través das persoas polas que puido pasar".

De feito, no auto do 13 de xaneiro polo que citaba a declarar como imputado a García Ortiz, o xuíz menciona que o polémico correo obxecto da filtración circulou "con saída" da Fiscalía "e destino Presidencia do Goberno"; "e de aí" ao medio elplural.com.

Pola súa banda, o antigo secretario de Estado de Comunicación Francesc Vallés asegurou ao xuíz que non tivo o correo nin tivo constancia do mesmo ata que o publicou ElPlural.es a mañá do 14 de marzo, xa que el estaba centrado nas eleccións catalás, por tanto, esta cuestión deixouna nun segundo plano.

Como Sánchez Acera, con quen dixo que non falou aquel día porque case non teñen relación, Vallés tamén cambiou de móbil, aínda que no seu caso dixo que conserva as mensaxes, e que estaría disposto a entregar o seu terminal ao maxistrado, que non o estimou necesario, segundo as fontes.

Ademais, explicou que lle remitiu noticias a Lobato sobre este asunto, pero coa intención de que estivese atento na Asemblea.