A OTAN prorroga un ano o mandato de Stoltenberg como secretario xeral

Os Estados membros da OTAN prolongaron un ano o mandato do noruegués Jens Stoltenberg como secretario xeral da Alianza, de modo que seguirá á fronte da organización transatlántica ata o 1 de outubro de 2024.

"Honrado pola decisión dos aliados da OTAN de estender o meu mandato como secretario xeral ata o 1 de outubro de 2024", escribiu Stoltenberg no seu perfil da rede social Twitter.

Honoured by #NATO Allies' decision to extend my term as Secretary General until 1 October 2024. The transatlantic bond between Europe & North America has ensured our freedom & security for nearly 75 years, and in a more dangerous world, our Alliance is more important than ever.

— Jens Stoltenberg (@jensstoltenberg) July 4, 2023

O exprimeiro ministro noruegués engadiu que o vínculo transatlántico entre Europa e América do Norte "garantiu a nosa liberdade e seguridade durante case 75 anos".

"Nun mundo máis perigoso, a nosa Alianza é máis importante que nunca", asegurou.

Fontes aliadas xa adiantaran a semana pasada que Stoltenebrg seguiría un ano máis á fronte da Alianza. Entón, detallaron que a renovación non era aínda oficial, pero estaba "avanzadísima".

De feito, xa sinalaron que o anuncio oficial da renovación se produciría esta semana se non había imprevistos.

Nun comunicado, a OTAN sinalou que a decisión tomada hoxe no Consello do Atlántico Norte, que reúne os Estados membros, será apoiada polos líderes dos países aliados no cume de Vilna, que se celebra o 11 e 12 de xullo.

A Alianza agregou que os aliados "agradeceron ao secretario xeral polo seu liderado e compromiso, que foi crítico para preservar a unidade transatlántica ante desafíos sen precedentes para a seguridade".

Antes da renovación, o mandato do político noruegués á fronte da organización transatlántica concluía o próximo 30 de setembro.

Durante os últimos meses debatíase se os países da OTAN elixirían un sucesor ou se decantarían por estender o mandato de Stoltenberg unha vez máis.

Finalmente, os Estados membros da Alianza acordaron que Stoltenberg siga un ano máis como secretario xeral da OTAN, cargo que ocupa desde outubro de 2014.

Neses case nove anos, renovouse o seu mandato varias veces. De feito, a portavoz da OTAN Oana Lungescu indicou en Twitter que a renovación de Stoltenberg como secretario xeral anunciada hoxe é a cuarta.

A pesar da renovación, Stoltenberg asegurara durante as últimas semanas que non buscaba unha nova extensión do seu mandato.

Con todo, o pasado 15 de xuño tamén admitiu: "Son responsable de todas as decisións que esta Alianza ten que tomar, excepto dunha, e esa é a que trata sobre o meu futuro".

"Iso corresponde decidilo aos 31 aliados", manifestou entón.