A primeira xornada deixa a Bandeira da Concha máis igualada da historia
Os cinco primeiros da categoría masculina están en oito segundos, e as catro primeiras da feminina en catro segundos
Cabo da Cruz defenderá a sexta posición na segunda xornada
Disputouse a primeira xornada da Bandeira da Concha que apunta a ser unha das máis igualadas de todos os tempos. Cabo da Cruz, a única representante galega, gañou o duelo directo que tivo con Getaria e defenderá a sexta posición na segunda xornada.
O triunfo na categoría masculina foi para Urdaibai, pero o triunfo final queda máis aberto ca nunca. Houbo cinco traiñeiras en menos de oito segundos e todas afrontarán con opcións a regata do vindeiro domingo. Ademais dos de Bermeo están Hondarribia, Orio, Donostiarra e Zierbena que pelexarán pola gran bandeira da temporada.
Na categoría feminina tamén vai ser unha segunda tirada de infarto con catro traiñeiras en catro segundos. Gañou contra todo prognóstico Tolosa. A 16 décimas chegou Arraun Lagunak, a favorita, e tamén manteñen todas as posibilidades Donostiarra e Orio.
