Colisión na autovía A-52 ao chocar un camión cun turismo detido na beiravía
A condutora do turismo tivo que ser excarcerada do seu coche e trasladada en helicóptero ao CHUO en estado grave
A condutora do vehículo quedou atrapada no interior do seu coche
Un camión porta-vehículos chocou por alcance contra un turismo que se atopaba detido na beiravía na autovía á altura de Ourense.
Como consecuencia do impacto, a condutora do vehículo quedou atrapada no interior e resultou ferida de gravidade. Os servizos de emerxencia desprazáronse rapidamente ao lugar, sendo necesaria a intervención dos bombeiros para excarcerar á vítima.
A condutora foi trasladada de urxencia ao Complexo Hospitalario Universitario de Ourense (CHUO) a bordo do helicóptero medicalizado H4.
O accidente afectou notablemente ao tráfico, quedando unicamente habilitado o carril esquerdo da vía, xa que o camión implicado sufriu importantes danos que obrigaron a pechar o carril dereito.
As probas de alcoholemia e drogas realizadas ao condutor do camión resultaron negativas. A circulación quedou completamente restablecida ás 21:10 horas. As autoridades continúan investigando as causas do accidente.
