A seca obriga a Ribadavia a racionar a auga da traída durante días
En Santo André de Camporredondo levan días con restricións na auga da traída. Aquí é a asociación de veciños a que se ocupa de xestionala e viuse obrigada a facer cortes para garantir a subministración.
As altas temperaturas e a falta de precipitacións deixan as fontes sen apenas auga.
Din os veciños que aqueles que teñen pozos vanse apañando no día a día, pero para os que non os teñen a situación é algo máis complicada.
Na asociación de veciños apuntan a necesidade de aforrar auga da traída e de utilizala de xeito responsable, de limitala só para uso doméstico.
O de Santo André é tan só un exemplo das moitas localidades que están a padecer restricións por mor da seca.
Noutras, como A Grova ou a propia Ribadavia, buscan solucións para non ter que aplicar cortes de auga na subministración domiciliaria, como xa acontece en localidades doutros municipios, como Vilar de Barrio ou Porqueira.
