Activada a prealerta por seca na contorna de Pontevedra ao descender o caudal do río Lérez
Activada a prealerta por seca na contorna de Pontevedra ao descender o caudal do río Lérez
Augas de Galicia recomenda un consumo responsable e, aínda que non impón restricións á auga, pide aos concellos que adopten medidas
Os concellos afectados son: Barro, Bueu, Campo Lameiro, Cerdedo-Cotobade, A Estrada, Forcarei, Marín, Meaño, Moraña, Pontevedra, Poio, Ponte Caldelas e Sanxenxo
Imaxe de arquivo do río Lérez ao seu paso por Pontevedra
A Oficina Técnica da Seca da Xunta acordou este mércores activar a prealerta por escaseza de auga na cidade de Pontevedra e noutra ducia de concellos afectados. Decidiuse despois de que se detectase, desde mediados de xullo, un descenso do caudal do río Lérez. A isto engádese o aumento da poboación durante os meses de verán na zona.
Así o informa a Administración autonómica nun comunicado no que precisa que os concellos aos que afecta a prealerta son Barro, Bueu, Campo Lameiro, Cerdedo-Cotobade, A Estrada, Forcarei, Marín, Meaño, Moraña, Pontevedra, Poio, Ponte Caldelas e Sanxenxo.
Esta situación non implica restricións no uso de auga, senón recomendacións e unha realización dun seguimento intensivo da situación meteorolóxica e os niveis de ríos, encoros e acuíferos da demarcación Galicia-Costa, así como das posibles incidencias que se detecten. Iso si, os concellos están facultados para tomar as medidas que consideren necesarias, dentro das súas competencias.
A Oficina Técnica da Seca da Xunta suxire á poboación que empregue a auga dunha forma máis responsable e que evite actividades que máis consumen, como encher piscinas e regar con auga potable. Ademais, pide que teñan boas prácticas no fogar, como ducharse no canto de bañarse, utilizar a función 'eco' dos electrodomésticos e evitar malgasto.
Do mesmo xeito, recomenda aos concellos que minimicen os consumos de augas municipais non esenciais, como baldeos, regados de parques e xardíns, e duchas de auga potable nas praias.
Nesta liña, tal e como establece o plan de seca da Demarcación Galicia-Costa, Augas de Galicia informará por escrito desta declaración de prealerta aos alcaldes dos municipios incluídos na unidade territorial do Lérez.
Tamén trasladará na comunicación aos concellos as medidas que propón adoptar neste estado de prealerta, entre as que se inclúe o incremento da frecuencia do control e vixilancia dos indicadores e o intercambio e actualización de información da evolución dos caudais.
Pode haber medidas a nivel local
Así mesmo, incidirase en medidas de concienciación sobre a escaseza e a necesidade de aforro a través de campañas e bandos municipais. A maiores, solicítase a implicación dos concellos para establecer as medidas que consideren apropiadas no marco das súas competencias.
Neste sentido, o escrito pedirá aos gobernos locais que anticipen que medidas consideran oportunas no caso de que a situación vaia a peor e que comuniquen a Augas de Galicia calquera incidencia que se produza.
A activación de prealerta por escaseza acordouse este mércores na reunión da Oficina Técnica da Seca, presidida polo director de Augas de Galicia, Roi Fernández, e que contou coa participación tanto de distintos técnicos do organismo hidráulico autonómico como de representantes de Protección Civil, Meteogalicia e as consellerías de Sanidade e Medio Rural.
A pesar da activación da prealerta, a Xunta explica que non se advirte "unha situación de seca prolongada en ningunha das concas da demarcación hidrográfica de Galicia-Costa", tampouco na do Lérez.
O organismo autonómico asegura que as concas restantes están "en situación de normalidade". De feito, a ocupación actual dos encoros de abastecemento en Galicia-Costa é de preto do 86 %, máis de tres puntos por encima da media nos últimos anos (82,7%).
Setembro sen moita choiva
No encontro tamén se avaliou a situación meteorolóxica das concas e constatouse que na primeira quincena de agosto predominou a situación anticiclónica, a pesar de choivas puntuais, e que esta segunda quincena está a ser máis anticiclónica que a primeira.
Con todo, o prognóstico meteorolóxico a curto prazo apunta a que haberá algunha precipitación de carácter tormentoso na zona de Pontevedra durante a próxima fin de semana.
A medio prazo, prevese un mes de setembro normal, sen moitas precipitacións, que poderían darse con maior probabilidade a finais de mes. Por tanto, recoméndase cautela ante o escenario de certa incerteza en relación coas posibles choivas, o que reforza a decisión da Oficina da Seca.
