Unha xamonería de Perillo perde máis de 600 euros tras unha reserva pantasma

A reserva foi telefónica e catro días antes. Unha muller pedía unha mesa para cear un venres, un total de 25 persoas.

"Nesa reserva previa facilitaron un número de teléfono falso. Porén, o meu fillo logrou contactar con ela a través dunha rede social", explica Luis Longhi, o xerente do negocio.

Tras aclarar ese malentendido, o mesmo venres pola mañá unha rapaza achegouse á xamonería para pechar o menú, pero ás dez e media da noite, que era a hora da cea, non se presentou ninguén.

"Pechei a terraza para eles, para que estivesen máis cómodos... O importe do que encargaron ascende a 629 euros. Isto sen contar a bebida. E aquí todos os venres temos completo", engade Luis.

E para que non se repita, decidiron interpoñer a correspondente denuncia.

"Perséguese unha sanción que impón o Estado. Nós, loxicamente, imos solicitar tres anos de prisión, pero somos conscientes de que, ao mellor, a pena é inferior aos dous anos. Poderíase suspender en caso de non ter antecedentes penais".

Amais, Luis está pensando en pedir un adianto para as reservas de grupos coa finalidade de protexer o seu negocio.