A UE di que responderá aos aranceis de Trump con medidas firmes e proporcionais

A presidenta da Comisión Europea, Ursula von der Leyen, asegurou este martes que a UE responderá con "contramedidas firmes e proporcionais" aos aranceis do 25 % que o luns impuxo o presidente dos Estados Unidos, Donald Trump, a todas as importacións de aceiro e aluminio.

"Lamento profundamente a decisión dos Estados Unidos de impoñer aranceis ás exportacións europeas de aceiro e aluminio. Os aranceis son impostos: malos para as empresas, peores para os consumidores", escribiu Von der Leyen nunha declaración que tamén divulgou nas súas redes sociais.

Por iso, dixo a presidenta da Comisión, "os aranceis inxustificados aplicados á UE non quedarán sen resposta: desencadearán contramedidas firmes e proporcionadas. A UE actuará para salvagardar os seus intereses económicos. Protexeremos os nosos traballadores, empresas e consumidores".

Ao mesmo tempo, nun discurso ante o Parlamento Europeo en Estrasburgo, o comisario europeo de Comercio, Maros Secofic, dixo que Bruxelas "está a analizar actualmente o alcance das medidas" anunciadas por Trump, antes de anunciar a contraofensiva.

"Esta é a forma de protexer o interese de Europa, pero non é o noso escenario preferido. Seguimos comprometidos co diálogo construtivo, estamos listos para as negociacións e atopar solucións mutuamente beneficiosas alá onde sexa posible", afirmou Sefcovic.

"Non haberá excepcións nin exencións. Será para todos os países", di Trump.

O presidente dos Estados Unidos, Donald Trump, asegurou este luns á noite que non haberá excepcións e que os aranceis serán "para todos os países". Así o dixo tras asinar no Despacho Oval dúas ordes executivas para impoñer gravames arancelarios do 25 % ás importacións de aluminio e aceiro.

"Isto é importante, imos facer os Estados Unidos ricos de novo", indicou o gobernante despois de facer efectiva a orde de aumento arancelario, que afectará, entre outros, a México, o Canadá ou o Brasil.

A Casa Branca asegurou que os aranceis serán aplicados a nivel global e que non haberá excepcións a ningún país en importacións de aceiro e aluminio. "Non haberá excepcións nin exencións. E será para todos os países", indicou Trump, quen revelou que nas próximas catro semanas terá reunións para analizar novos aranceis, e puxo como exemplo vehículos, semicondutores ou produtos farmacéuticos.

A orde executiva, publicada pola Casa Branca, sinala que as importacións de aceiro e aluminio "ameazan con menoscabar a seguridade nacional", e que os acordos vixentes ata o de agora conclúen o 12 de marzo de 2025, data a partir da cal os produtos sinalados serán obxecto dos novos aranceis.

O Canadá é a principal orixe do aceiro importado polos EUA, seguido de México, Corea do Sur, o Brasil e Vietnam, segundo datos do Instituto Americano do Ferro e o Aceiro. En canto ao aluminio, os Estados Unidos obtén case dous terzos de subministración do Canadá, de acordo coa Asociación do Aluminio.

Durante o seu primeiro mandato, en 2018, Trump impuxo aranceis do 25 % ás importacións de aceiro e do 10 % ás de aluminio, aínda que logo concedeu exencións a países como Australia, Brasil, Canadá e México.

O presidente estadounidense reiterou este luns que ten intención de anunciar nos próximos días "aranceis recíprocos" para equiparar os gravames que outros países aplican ás exportacións estadounidenses.

"Non queremos ferir a outros países, pero aproveitáronse durante anos de nós e impóñennos aranceis. A maioría cóbrannos e nós non o fixemos. É a hora de ser recíprocos", engadiu Trump desde o Despacho Oval.

Non especificou que países se verán afectados por eses aranceis recíprocos, aínda que o presidente criticou en reiteradas ocasións o 10 % que a Unión Europea impón aos automóbiles importados, moi por encima do 2,5 % que aplican os Estados Unidos.