A xuíza da DINA encarga á Garda Civil unha cronoloxía do 29-O e pregunta se houbo receso no CECOPI

A titular do Xulgado de Primeira Instancia e Instrución Número 3 de Catarroja (Valencia), que investiga as mortes e lesións causadas pola DINA, encargou á Unidade Orgánica da Policía Xudicial da Garda Civil a elaboración dun informe que detalle a cronoloxía dos feitos sucedidos o pasado 29 de outubro.

Entre as dilixencias de investigación acordadas pola xuíza, destaca o requirimento á Consellería de Interior e Emerxencias para que informe, no prazo de tres días, se durante a reunión que se mantivo no Centro de Coordinación Operativa Integrado (CECOPI) o 29 de outubro de 2024 se produciu algún receso.

A instrutora pediu á Universitat de València, que acordou suspender as clases o día da DINA, que informe de que órgano concreto tomou esa decisión, en que información se sustentou e se nela participou algún técnico.

Ese informe coa cronoloxía do 29 de outubro encargado á Garda Civil deberá cinguirse á análise do desbordamento dos ríos, barrancos e encoros en relación cos falecementos e lesionados rexistrados.

A confección dese documento fora solicitada pola Fiscalía nun escrito datado o pasado 21 de febreiro no que se pedía que o atestado policial fose máis amplo e incluíse outros extremos que foron denegados pola instrutora.

A titular do Xulgado entende que xa avanzada a investigación e acordado un importante número de dilixencias, é dicir, xudicializada xa a causa, a análise da evitabilidade dos falecementos e a posible comisión de delitos non pode trasladarse a un informe policial.

“Lembrarase que nun atestado de tales características sería precisa a toma de declaración de testemuñas e que diversas acusacións particulares e populares solicitaron a declaración dos querelados, polo que a declaración dos eventuais investigados non pode efectuarse policialmente”, precisa a xuíza.

A maxistrada destaca a utilidade das pezas xornalísticas e gravacións audiovisuais efectuadas polos medios de comunicación que estes achegaron ao xulgado tras serlles requiridas, que permiten facerse unha idea de como evolucionou a situación o 29 de outubro.

Un informe da Generalitat mostra con imaxes que chegou ás 20:28 horas

Un informe asinado polo coordinador de Prevención e Emerxencias da Generalitat valenciana baseado en imaxes das cámaras do sistema de seguridade do Centro de Coordinación de Emerxencias (CECOPI) mostra a chegada de Carlos Mazón a esas instalacións ás 20:28 horas do día da DINA.

O mesmo informe, datado o pasado día 18, recolle o acceso doutras autoridades para partir do visionado das cámaras. En concreto, ás 15:53 horas chegou ao CECOPI o director xeral de Emerxencias e Extinción de Incendios, Alberto Javier Martín Moratilla; ás 16:56 a entón conselleira de Xustiza e Interior, Salomé Pradas, e ás 17:45 horas o presidente da Deputación de Valencia, Vicente José Mompó.