A Xunta oponse a unha repartición obrigatoria de menores inmigrantes, que calcula en máis de 300

A Xunta de Galicia calcula que terá que acoller uns 300 menores migrantes tras a aprobación do real decreto-lei que reforma o artigo 35 da lei de estranxeiría, que chega tras alcanzar o Goberno un acordo con Junts para que a iniciativa poida saír adiante.

A conselleira de Política Social e Igualdade, Fabiola García, asegurou que Galicia "non vai aceptar unha repartición obrigatoria" dos menores migrantes non acompañados como ordena o Goberno central. Criticou que este documento "inclúe criterios feitos para beneficiar a Cataluña, un traxe a medida feito para o señor Puigdemont polo seu socio Pedro Sánchez".

Fabiola García lembrou que "ata o de agora, Galicia sempre foi solidaria" acollendo a menores, pero cun acordo voluntario entre as distintas comunidades que, ademais, integra "no sistema de protección sen prazas específicas".

Segundo o decreto, indicou, a Galicia corresponderíanlle "máis de 326 menores e a Cataluña, 28". "No noso sistema xa temos sobreocupación do 104 %. Galicia non ten capacidade para acoller tal cantidade", sinalou, e informou de que a día de hoxe hai "800 menores".

A conselleira solicitou ao Goberno central "que rectifique, que volva aos acordos voluntarios" porque non se trata "de paquetería, son menores, e hai que darlles a mellor calidade de vida".

"Pedimos que continúe coa vía de consenso e non de imposición porque Galicia non vai aceptar, imos utilizar todas as medidas para frear o Goberno de España", concluíu.

"Sánchez compraría uns días máis na Moncloa"

Pola súa parte, o presidente da Xunta, Alfonso Rueda, volveu criticar o acordo entre Junts e o Goberno. "Satisfeito ten que estar o señor Puigdemont, que desde Waterloo ten a capacidade de dicir os menores non acompañados que temos que recibir cada comunidade", afirmou.

"Parece feito a propósito, 26 a Cataluña, 326 a Galicia, xusto 300 máis", aseguraba Rueda, de visita en Melilla. "Quero pensar que tamén estará moi satisfeito o presidente do Goberno, o señor Sánchez, porque compraría uns días máis, non sei cantos, de permanencia na Moncloa", concluíu.

O Goberno aclara que a repartición farase cando teña todos os datos

Pola súa banda, o Executivo central matiza que para que se poida establecer a repartición, as comunidades autónomas deben comunicar a cantidade de menores que teñen agora para ter unha foto fixa do momento. 

O Goberno quere saber antes do 31 de marzo cantas delas pertencen a menores procedentes das sucesivas remesas de migrantes chegados ás Canarias. Cando se teñan estes datos certificados, explican, poderanse aplicar os criterios e ter a cifra de acollida de cada comunidade autónoma.

Tal e como explicou este martes o ministro de Política Territorial e Memoria Democrática, Ángel Víctor Torres, os criterios para declarar a situación de continxencia migratoria extraordinaria deberán aprobarse na Conferencia Sectorial de Infancia e Adolescencia nun prazo máximo de tres meses, antes do 20 de xuño.

Con todo, se non se consegue a unanimidade das comunidades autónomas na Sectorial, estes criterios regularanse conforme establece o real decreto lei aprobado este martes polo Consello de Ministros, que reforma o artigo 35 da lei de estranxeiría e entra en vigor este xoves tras publicarse hoxe no Boletín Oficial do Estado (BOE).

A norma, que en todo caso deberá ser validada polo Parlamento, establece unha repartición obrigatoria de menores migrantes non acompañados desde as Canarias, Ceuta e Melilla ao resto de España.

Nun documento de 15 páxinas, o denominado Real Decreto-Lei de Medidas Urxentes para Garantir o Interese Superior da Infancia e a Adolescencia recolle un novo artigo 35 que establece criterios para a distribución de menores, como a poboación, a renda per cápita, a taxa de paro, o esforzo realizado anteriormente, o número de prazas para a acollida ou a condición de cidade fronteiriza ou de insularidade.

Estes criterios poden ser modificados pola Conferencia Sectorial de Infancia e de Adolescencia.