A Xunta lanza a marca I+G+I para visibilizar a ciencia feita en Galicia
Alfonso Rueda anuncia tres novas convocatorias de 10 millóns para proxectos tecnolóxicos
Igual que os produtos galegos teñen unha marca propia, a de Galicia Calidade, a Xunta quere que a investigación feita en Galicia se recoñeza no mundo enteiro polo seu nome. Con ese obxectivo acaba de lanzar a marca I+G, de Galicia,+I, que lle presentaron este mércores ao sector o xefe do Goberno galego, Alfonso Rueda, nun acto celebrado na Cidade da Cultura.
Á presentación asistiron unhas 800 persoas das tres Universidades galegas e dos centros tecnolóxicos e empresas do país. No acto organizouse unha mesa redonda con África González (catedrática de Inmunoloxía da UVigo), Santiago Domínguez (CEO de MestreLab) e Antoni Pons (director do CEMIT), que falaron dalgúns retos do sector, como a remuda xeracional ou que as empresas teñan capital galego.
Visibilizar, atraer talento investigador, captar investidores privados para crear empresas do sector son precisamente algúns dos obxectivos que recolle o Plan Galego de Investigación, dotado con 1.310 millóns de euros ata o 2027, que busca, di o Alfonso Rueda, consolidar Galicia como referente da innovación. O presidente da Xunta dixo que este mércores a Xunta anuncia tres novas convocatorias por máis de dez millóns de euros para proxectos de biotecnoloxía, IA, cuántica e investigación empresarial.
