Achan no Convento de Santa Clara de Pontevedra unhas pinturas murais de hai case 500 anos
A Deputación de Pontevedra destaca que son "únicas en Galicia" e confirma que conservará estes lenzos, xa que quere que se poidan visitar
Os traballos de rehabilitación do Convento de Santa Clara, en Pontevedra, permitiron descubrir unhas pinturas murais cunhas características artísticas e históricas que son "únicas en toda Galicia" e que datan de entre 1570 e 1580.
Así o avanzou este luns o vicepresidente primeiro da Deputación de Pontevedra, Rafa Domínguez, ao comparecer no antigo cenobio das clarisas acompañado do profesor emérito da Universidade de Santiago de Compostela (USC) José Manuel García Iglesias, doutor en Historia da arte, catedrático e unha das máximas autoridades en pinturas murais de Galicia e España.
No caso destas pinturas descubertas no recinto pontevedrés de Santa Clara, remóntanse aos anos 1570 – 1580 e atopáronse dúas capas de pinturas murais no antigo refectorio.
Destaca unha imaxe dun corazón rexistrado nunha aguia, que este experto cre que "non hai en ningún outro lugar" e que remite ao segundo tomo dun libro incunable, de finais do século XV, publicado en Basilea (Suíza). Nese libro recollíanse os sermóns de Santo Agostiño (na Catedral de Segovia consérvase un exemplar no seu arquivo, o único en España).
Ademais desta imaxe tamén aparece outra de Cristo entre estrelas, unha de Santa Clara e outro conxunto, de temática vexetal, que parece indicar que nel estaría representado San Francisco.
O experto lembrou que se estas pinturas murais chegaron ata os nosos días foi "porque estiveron tapadas". No momento de retirar a cal ou o retablo que ocultaba un dos murais, as pinturas envellecen e en vinte ou trinta anos escurecen, "polo que hai que traballar sobre elas continuamente".
García Iglesias explicou que a finais do século XVI as pestes levaron a que os espazos se branqueasen con cal, rompendo así a historia da pintura mural, cunha tradición moi importante desde os tempos do prerrománico ata o século XVI.
O vicepresidente xa confirmou que a Deputación de Pontevedra ten previsto "manter e conservar" estas pinturas murais e que quere que se poidan visitar.
