Alcaraz deixa un set, pero xa está nos oitavos do Aberto de Australia
Alcaraz deixa un set, pero xa está nos oitavos do Aberto de Australia
Gañoulle ao portugués Borges por 6-2, 6-4, 6-7, 6-2
Davidovich no cadro masculino e Badosa no feminino tamén pasaron de rolda
O murciano Carlos Alcaraz, terceiro favorito no Aberto de Australia, impúxose ao portugués Nuno Borges por 6-2, 6-4, 6-7, 6-2 na terceira rolda do Aberto de Australia e xa está nos oitavos de final do primeiro Grande da temporada.
Non o tivo doado un Alcaraz que deixou o primeiro set do torneo ao estar o seu rival moito máis atinado no tie break. Entrou no partido como un ciclón un Alcaraz que lle rachou o servizo de inicio a Borges para levarse o primeiro set pola vía rápida. No segundo cada xogador mantivo o seu servizo ata que no 5-4 o español soubo xogar cos nervios do seu rival e deixar o partido moi encamiñado.
A morte súbita do terceiro prolongou o partido pero na cuarta manga Alcaraz xa non perdoou. É a segunda vez que Alcaraz vai disputar uns oitavos de final en Melbourne Park. O ano pasado chegou ata os cuartos de final nos que caeu diante de Zverev.
Badosa e Davidovich, ao límite pero seguen adiante
Tamén se meteron nos oitavos de final Paula Badosa no cadro feminino e Davidovich no masculino, os dous con partidos moi longos. Badosa derrotou en tres sets a Kostyuk (6-4, 4-6, 6-3) e Davidovich remontou dous sets diante de Mensik con tie break incluído no terceiro parcial para lograr un pase moi meritorio (3-6, 4-6, 7-6, 6-4, 6-2).
