Alemaña celebrará as vindeiras eleccións xerais en setembro do 2025
Alemaña celebrará as vindeiras eleccións xerais en setembro do 2025
As enquisas atribúenlle á Unión Demócrata Cristiá un 30 % da intención de voto
As próximas eleccións xerais en Alemaña celebraranse o 28 de setembro de 2025, segundo decidiu este venres o presidente alemán, Frank-Walter Steinmeier.
O xefe de estado alemán promulgou esa data por recomendación do Goberno Federal, segundo informou nun comunicado a oficina do xefe de Estado.
O chanceler alemán, Olaf Scholz fixera público na súa última conferencia de prensa de verán, o pasado 24 de xullo, que esa data de setembro de 2025 era a elixida para a celebración das que serán a gran cita coas urnas do país máis poboado de Europa e a maior economía do Vello Continente.
A falta de pouco máis dun ano para a celebración desas eleccións xerais antes sucederán outras votacións importantes, como as previstas para o 1 de setembro en Saxonia e Turingia, estados federados do este alemán.
Tamén o próximo mes de setembro, o día 22, votará outro estado federado do este, o de Brandeburgo, territorio que envolve o land da capital, Berlín.
Esas tres citas coas urnas son as máis importantes que precederán en Alemaña á votación na que Scholz xa dixo que aspira a repetir como candidato á súa reelección como chanceler.
Actualmente as sondaxes de intención de voto non son favorables nin a Scholz nin á súa formación, o Partido Socialdemócrata de Alemaña (SPD), así como tampouco para os socios da súa coalición gobernamental (Os Verdes e os liberais do FDP).
Recentes enquisas sitúan eses tres partidos por detrás da Unión Demócrata Cristiá (CDU), o principal partido da oposición, á que se atribúe aproximadamente un 30 % da intención de voto.
Ao SPD véselle practicamente igual de forte (15% segundo a sondaxe máis recente da televisión pública ARD) que a Alternativa para Alemaña (AfD), partido de ultradereita á que esa fonte lle atribúe un 16 % dos votos, mentres que aos Verdes se lles concede nas sondaxes arredor do 12 %.
Os liberais, pola súa banda, loitarán por superar o 5 % necesario para lograr representación no Bundestag, a Cámara Baixa do Parlamento alemán na que ten lugar, tras as eleccións xerais, a votación na que os deputados elixen o chanceler.
