Alemaña comeza a facer controis nas súas fronteiras terrestres para frear a migración irregular

Alemaña controla desde este luns de forma aleatoria o paso por todas as súas fronteiras terrestres co obxectivo de combater a migración irregular.

Os controis serán flexibles e instalaranse alí onde a policía ten coñecemento de que hai un particular fluxo migratorio irregular. Inspeccionaranse exclusivamente aqueles vehículos que esperten sospeitas, segundo especificou unha portavoz policial, Sonjia Kock.

A policía esforzarase para que ditas inspeccións "impacten o menos posible" na vida cotiá das persoas que viaxan por traballo, así como no transporte de pasaxeiros e de mercadorías, aínda que, segundo o ministerio, non se poden descartar que as medidas provoquen nalgúns momentos atrasos "puntuais e temporais".

Segundo advertiu o Ministerio do Interior, "a dimensión, a intensidade, o lugar concreto e a duración concreta de cada control dependen entre outros factores do desenvolvemento da situación e das infraestruturas de transporte existentes sobre o terreo e, por iso, poden ter diferentes características e dinámicas rexionais".

Este tipo de recoñecementos xa se implantaron nas fronteiras orientais e meridionais de Alemaña a finais do ano pasado e non causaron colas significativas nos pasos fronteirizos con Polonia, República Checa, Austria ou Suíza.

Neste período de tempo, segundo o Ministerio do Interior, rexeitouse nesas fronteiras a unhas 30.000 persoas que carecían da documentación necesaria para ingresar ao país e que non reclamaron asilo, dunhas 50.000 que foron interceptadas en total.

A medida, anunciada polo Goberno alemán ante a crecente presión da oposición conservadora e da ultradereita no ámbito da política migratoria, non logrou satisfacer ese sector do espectro político, que reclama que nas fronteiras se rexeiten tamén os demandantes de asilo, nin tampouco os países veciños.