A Reserva Federal dos Estados Unidos baixa os tipos en 50 puntos básicos

O Comité Federal de Mercado Aberto da Reserva Federal de Estados Unidos decidiu este mércores baixar os tipos de xuro en 50 puntos básicos por primeira vez desde marzo de 2020, o cal os deixa no rango obxectivo do 4,75 % ao 5 %.

No seu comunicado, a entidade subliñou que dispón dunha "maior confianza" en que a inflación está a converxer de forma sostida co obxectivo de estabilidade de prezos do 2 % e que os riscos para optimizar emprego e inflación están "máis ou menos equilibrados".

"Os indicadores recentes suxiren que a actividade económica seguiu crecendo a bo ritmo. O aumento do emprego retardouse e a taxa de paro subiu, pero segue sendo baixa. A inflación seguiu avanzando cara ao obxectivo do 2 % fixado polo Comité, pero segue sendo algo elevada", resumiu.

Así, indicou que á hora de modificar a taxa de referencia estará atento aos datos entrantes, a evolución da contorna macroeconómica e o balance de riscos.

Neste sentido, o instituto emisor asegurou que estará "preparado" para axustar os tipos, de ser necesario, e para iso analizaranse as lecturas do mercado laboral, de inflación e mais os efectos derivados dos acontecementos internacionais e financeiros.

Por outra banda, todos os membros do Comité votaron a favor da rebaixa de medio punto, excepto Michelle Bowman, pertencente á ala hawkish da Reserva, é dicir, partidaria dunha política monetaria menos acomodaticia e dunha redución de 25 puntos básicos.