Rueda, tras a xuntanza con Sánchez: "Moitas boas palabras, moi poucas concrecións"

O presidente da Xunta, Alfonso Rueda, pediulle este venres ao presidente do Goberno, Pedro Sánchez, que aborde a reforma do financiamento "de forma multilateral" e que "corte de raíz" os acordos con Cataluña.

Tras a xuntanza no Palacio da Moncloa co xefe do Executivo, na súa primeira valoración Rueda asegurou que "houbo moitas boas palabras, pero moi poucas concrecións".

O encontro comezou pasadas as 12:30. Sánchez recibiu a Rueda nas escaleiras de acceso ao palacio da Moncloa. Tras o saúdo entre ambos e despois de posar para os medios gráficos, os dous dirixíronse cara ao interior para iniciar a xuntanza, que durou aproximadamente unha hora e media.

"A discusión ten que facerse con todas as comunidades"

A presidencia da Xunta de Galicia remitira á Moncloa unha proposta de asuntos a tratar na reunión. A cuestión do financiamento autonómico figuraba entre as que a Xunta lle daba prioridade, e Rueda insistiu en que debe ser "negociada de maneira multilateral" e pediu que se convoque a Conferencia de presidentes.

Respecto a isto, Rueda explicou na comparecencia posterior que Sánchez lle dixo que se convocaría a Conferencia de Presidentes, pero que sería para falar de vivenda. “Non me deu data para unha Conferencia de Presidentes, creo que será pronto, pero cando lle pedín que versase sobre financiamento e non só sobre vivenda, díxome que as Conferencias de Presidentes son para chegar a acordos e que sobre este asunto non vía posible o acordo”, relatou Rueda.

Asegurou o presidente da Xunta que Pedro Sánchez non lle adiantou ningunha proposta sobre o novo sistema de financiamento, e que non recibiu "ningunha oferta" para negociar unha quita da débeda.

No que foi o primeiro encontro de Sánchez e Rueda despois de que o presidente da Xunta tomara posesión do cargo o pasado mes de abril, este tamén levou outros temas referentes a infraestruturas.

Infraestruturas

No que se refire á AP-9, e ao seu traspaso, o presidente da Xunta, volveu pedir que o Executivo central non se opoña a que sexa Galicia quen xestione esta infraestrutura.

E respecto ás infraestuturas ferroviarias, Alfonso Rueda presentou as demandas de Galicia respecto a conexións como as de Ferrrol ou Lugo, o impulso ao corredor atlántico noroeste de mercadorías, e en especial o interese pola saída sur de Vigo e á conexión en alta velocidade con Portugal.

Fondos europeos e Altri

Noutra orde, Rueda tratou co presidente do Goberno a situación dos proxectos industriais e de transición verde, con especial atención aos fondos europeos, que a Xunta denuncia que aínda permanecen sen mobilizar polo Estado.

Rueda volveu propoñer ao Goberno que permita que as comunidades xestionen eses fondos europeos, pero asegurou que Sánchez respondeu negativamente, xa que o presidente do Goberno defendeu a xestión deses fondos.

E entre os proxectos nos que o presidente da Xunta insistiu en que ese financiamento dos Next Generation debe chegar ás empresas citou en especial o de Altri, "por ser un dos que está máis avanzado".

Transferencias e xestión do litoral

Así mesmo, Rueda pediu que se aborden cuestións relativas a transferencias de competencias pendentes, en concreto á que ten que ver co litoral, logo de que o Tribunal Constitucional avalase a norma galega, para que o Estado transfira a Galicia os recursos para poder xestionalo.

“O TC deunos a razón e hai tres meses pedimos o traspaso, para vernos nun peloteo entre ministerios. Sánchez comprometeuse a que inmediatamente se abrirá a comisión para a transferencia, e espero que cumpra”, explicou Rueda, quen dixo que fora único asunto no que recibira unha resposta concreta por parte de Sánchez.

A reunión deste venres sitúase nun marco no que Sánchez anunciou a súa intención de manter unha rolda de contactos con todos os presidentes autonómicos. Seguirá a orde estatutaria e xa este venres viuse co lehendakari, Imanol Pradales, antes da xuntanza con Rueda e, tras este, recibirá na mesma xornada ao andaluz Juanma Moreno.