Ángel Núñez, fichaxe do Leyma: "É un reto difícil, pero disto vai o deporte"
O aleiro defínese como un xogador que pode actuar en "posicións diferentes, con versatilidade, tanto ofensivamente como defensivamente"
Ángel Núñez xa está de volta na Coruña. Despois de liquidar os pertinentes trámites administrativos para poder xogar na ACB, o estadounidense de nacionalidade dominicana preséntase como novo xogador do Leyma.
Rictus serio e poucas palabras, asume o difícil reto de loitar pola permanencia no que será a súa estrea na mellor liga de Europa.
"É un 'challenge' (reto) difícil, pero disto vai o deporte, de adversidades".
O aleiro defínese como un xogador que pode actuar en "posicións diferentes, con versatilidade, tanto ofensivamente como defensivamente" e capaz de "tirar de fóra".
Núñez explica por que elixiu o proxecto do Leyma.
"Primeiramente pola oportunidade de vir aquí e competir a este nivel, coas mesmas ganas que ten o club por tratar de sobrevivir. Segundo, tamén polo país e as comodidades que ofrece para min e a miña familia no futuro".
