A Arxentina nomea novo embaixador en Madrid para pechar a crise diplomática con España

O diplomático de carreira Alejandro Eugenio Alonso Sainz foi designado este mércores como novo embaixador da Arxentina en España e asumirá o seu cargo á fronte da representación diplomática nas próximas semanas, informou a chancelería.

Alonso Sainz, excónsul arxentino en Barcelona, substituirá a Roberto Bosch Estévez, quen asumiu como embaixador en Madrid tras a chegada de Javier Milei á presidencia en decembro de 2023, en substitución de Ricardo Alfonsín.

Alfonsín, fillo do expresidente Raúl Alfonsín, exerceu ese cargo durante a xestión de Alberto Fernández (2019-2023).

O novo embaixador arxentino deberá intermediar co Goberno de Pedro Sánchez, unha vez redirixida a crise diplomática desatada en maio pasado, que terminou coa saída da entón embaixadora de España na Arxentina.

O incidente desencadeouse por unha visita de Milei a Madrid por invitación do partido Vox, durante a cal o presidente arxentino insulto a Sánchez e lle chamou "corrupta" á súa esposa, Begoña Gómez.

Co nomeamento do novo embaixador español en Bos Aires, Joaquín María de Arístegui, quen presentou cartas credenciais esta semana, España e A Arxentina reconduciron as relacións diplomáticas.

España é o segundo maior investidor na Arxentina, por detrás de Estados Unidos, e o noveno destino dos investimentos españois, segundo as últimas cifras que proporcionou o Ministerio de Exteriores (2021), mentres que o país suramericano é o décimo quinto país investidor en España.