Siria denuncia como ataque terrorista o último bombardeo israelí en Alepo

Polo menos 46 soldados das forzas gobernamentais sirias e membros do grupo xiíta libanés Hizbulá morreron este venres nunha serie de bombardeos perpetrados por Israel contra varias posicións da provincia de Alepo, no norte de Siria, informou o Observatorio Sirio de Dereitos Humanos.

A ONG dixo nun comunicado que 36 soldados sirios, sete combatentes de Hisbulá e outros milicianos proiranianos morreron nos ataques, que tiveron como obxectivo un almacén de mísiles do grupo xiíta, preto do aeroporto de Alepo, e outras instalacións.

Segundo o Observatorio, con sede no Reino Unido pero cunha ampla rede de colaboradores sobre o terreo, este é o ataque de Israel que deixou máis mortos en chan sirio nos últimos tres anos.

Así mesmo, a ONG indicou que se agarda un aumento na cifra de vítimas mortais porque o bombardeo deixou "decenas" de feridos en estado grave.

Segundo a axencia de noticias oficial siria SA, o ataque tivo lugar sobre as 1:45 hora local do venres, cando "o inimigo israelí lanzou unha agresión aérea desde Athriya, ao sueste de Alepo", que provocou a morte dun número non especificado de "civís e de persoal militar".

Así mesmo, o Ministerio de Exteriores sirio cualificou o ataque de "agresión terrorista" e lanzou un chamamento á comunidade internacional a "asumir as súas responsabilidades ante as graves e repetidas violacións israelís dos principios do dereito internacional".

Este ataque prodúcese un día despois de que Israel atacara ás aforas de Damasco e matara polo menos dous civís, de acordo coas autoridades sirias, nunha acción que tivo lugar apenas dez días despois doutra perpetrada polo Estado xudeu contra territorio sirio.

O Observatorio afirmou entón que o obxectivo foran almacéns de armas de Hisbulá, ao que Israel se enfronta na fronteira israelí-libanesa desde o pasado outubro e contra quen estivo cargando paralelamente en territorio sirio.

Aínda que xa tiñan lugar con anterioridade de forma relativamente frecuente, Israel intensificou as súas accións contra Siria desde o inicio da guerra de Gaza o pasado 7 de outubro e, a miúdo, ten como obxectivo as milicias proiranianas presentes no país como aliadas do Goberno sirio.

No que vai de ano, o Estado xudeu atacou o territorio sirio en 28 ocasións, a maioría delas por vía aérea, de acordo co observatorio.