Aspas, sobre o horario en Valladolid: "Isto xa empeza a ser unha broma de mal gusto"
Ningún outro club da máxima categoría supera a cifra de partidos en luns, venres e sábado ás 14:00 horas
O capitán e máximo goleador do Celta, Iago Aspas, expresou este martes o seu malestar polo horario dos partidos de Liga do seu equipo, tras coñecer que visitarán ao Real Valladolid o sábado 15 de marzo ás 14:00 horas.
"Isto xa empeza a ser unha broma de mal gusto", respondeu o dianteiro galego ao chío no que a Liga daba a coñecer o horario dos partidos da xornada 28 de LaLiga EASports.
Esto ya empieza a ser una coña de mal gusto https://t.co/fudD3MuHQc
— Iago Aspas Juncal (@aspas10) February 25, 2025
Ata a data, ningún outro club da máxima categoría supera a cifra de partidos en luns, venres e sábado ás 14:00 horas do equipo dirixido por Claudio Giráldez, que xogará os seus próximos tres compromisos (Xirona e Valladolid a domicilio e fronte ao Leganés en Balaídos) un sábado ao mediodía.
A mediados de novembro, os afeccionados do Celta xa gardaron silencio durante os primeiros 12 minutos do partido contra o Xetafe en Balaídos como medida de protesta contra LaLiga polos horarios que está a impoñer ao seu equipo esta tempada.
