Benassi: “O contrato de Lucas Pérez é basicamente indefinido”

O director xeral do R. C. Deportivo, Massimo Benassi, asegurou este luns que o dianteiro Lucas Pérez permanecerá no equipo “ata que el queira” porque o seu contrato é “basicamente indefinido”.

“Con Lucas non hai ningún problema. O seu contrato é basicamente indefinido, en canto xogue un número mínimo de partidos renóvase se o club está no fútbol profesional. Lucas estará aquí ata que el queira e como queira. É un futbolista fundamental para nós, el está moi contento e nós tamén con el”, explicou.

O directivo italiano destacou que neste mercado estival o club traballou “por baixo do límite salarial” por se fose necesario facer “axustes” na xanela de fichaxes de xaneiro.

“Non queremos excedernos para non entrar nun bucle que se descontaría a próxima tempada. Non tivemos problemas de inscrición de xogadores, como si sucedeu con outros equipos”, lembrou.

Neste sentido, apuntou que o Dépor ten “un tema aberto” coa Liga e a liga F porque “cremos que non é correcto para o desenvolvemento do fútbol feminino que se compute un gasto importante”.

“Estamos en conversacións informais porque non é correcto que se compute un gasto que está a asumir o club para o fútbol feminino. No noso caso, e no do Eibar por exemplo, non estamos a competir a nivel masculino nas mesmas condicións porque outros clubs non teñen equipos femininos en Primeira ou en Segunda División”, rematou.