Brazadas solidarias na Coruña para apoiar as persoas afectadas pola ELA

Cada ano diagnostícanse en España uns 900 novos casos de esclerose laterial amiotrófica, unha enfermidade dexenerativa do sistema nervioso para a que aínda non hai tratamento curativo.

Preto de douscentos nadadores molláronse pola ELA na duodécima travesía solidaria que organiza a asociación AGAELA en augas coruñesas.

O sol brillou para aliarse cos nadadores que desafiaron a temperatura das augas do Parrote para bracear pola ELA. Algúns mesmo prescindiron do neopreno para completar as dúas distancias da travesía, a máis longa de 1.000 metros.

Foi a duodécima edición do memorial Fran Otero, este ano coa mirada e as expectativas postas na aplicación efectiva da lei ELA, aprobada no mes de outubro no Congreso co apoio de todas as forzas políticas.

"Os enfermos da ELA necesitan uns coidados especiais, fundamentalmente nas fases máis avanzadas da enfermidade. O sistema de dependencia non dá resposta a este caso especial que a ELA e á dependencia que provoca", asegura Enrique Corral, xerente da asociación AGAELA.

A ELA é a terceira enfermidade neurodexenerativa máis frecuente despois do alzhéimer e do párkinson. En España hai ao redor de 4.000 persoas afectadas e cada día diagnostícanse tres novos casos.

Colectivos como AGAELA, que apoia as persoas enfermas e as súas familias en Galicia, salientan a importancia de investir en investigación. Precisamente a iso irá destinada a recadación íntegra desta travesía solidaria.

A conselleira de Política Social e Igualdade, Fabiola García, destacou durante a proba o traballo de entidades sociais na atención a persoas con ELA.

Por iso, agradeceu aos participantes o sumarse a esta iniciativa solidaria, lembrando que a Xunta é a "única" comunidade en crear axudas de ata 12.000 euros ao ano para pacientes con ELA.

A conselleira de Política Social e Igualdade, Fabiola García, presenciou a travesía e destacou o labor dos colectivos que atenden a persoas con ELA