Carmel Efron, supervivente da matanza de Hamas do 7-O: "Pedinlle a Deus que coidase da miña filla"
Carmel Efron, supervivente da matanza de Hamas do 7-O: "Pedinlle a Deus que coidase da miña filla"
Dos máis de 1.200 mortos daquel día, 364 eran asistentes ao Festivan Nova, celebrado moi preto de Gaza
Carmel Efron, membro do equipo de produción do evento, tivo que correr pola súa vida
Nissim Louk, pai dunha moza asasinada por Hamas con orixe galega
A ofensiva de Hamas do 7 de outubro do ano pasado estivo moi ben coordinada: comezou co lanzamento de foguetes sobre as seis e media da madrugada, e continuou cunha invasión terrestre de islamistas armados con fusís de asalto que disparaban de xeito indiscriminado.
"Escoitei berros, escoitei disparos e vin coches con buratos de bala. Vin feridos polo chan berrando, chorando, sangrando...", conta Carmel Efron, de 39 anos, que traballara toda a noite no equipo de produción do Festival Nova, celebrado moi preto de Gaza. Intentou axudar, pero chegou un punto en que tivo que correr pola súa vida.
"Os terroristas viñan detrás de nós, ían nos seus vehículos disparando contra nós, a balas rebotaban no chan e vin xente ao meu redor que caía", lembrou Efron nunha entrevista concedida á CRTVG.
Cando as súas forzas se esgotaron, Carmel agachouse nuns arbustos con outros asistentes. Os disparos soaban cada vez máis preto e entendeu que chegara a súa hora. Pensou na súa filla de seis anos, que deixara na casa cos seus pais. E decidiu subir á Internet a que pensou que sería a súa derradeira foto. Pediulles aos demais que sorrisen á cámara. Para que a súa pequena crecese cun recordo algo menos traumático.
"Estaba convencida de que non ía ver máis a miña filla. No meu corazón estaba a me despedir dela mentres lle pedía a Deus que a coidase", recoñeceu, Efron. Dos máis de 1.200 mortos daquel día, 364 eran asistentes ao Festivan Nova. Carmel logrou en última instancia poñerse a salvo e non formar parte desa lista.
