Condenado a 12 anos de cadea por abusar sexualmente dunha menor en Ferrol
Condenado a 12 anos de cadea por abusar sexualmente dunha menor en Ferrol
A vítima é filla dunha muller coa que o condenado tiña unha relación de amizade
![](https://img-g24-crtvg.flumotion.com/prog24/2022/20221021/audienciacoruna.png)
A Audiencia Provincial da Coruña condenou a doce anos de cárcere un home residente en Ferrol por abusar sexualmente dunha menor de 16 anos de forma continuada, filla dunha muller coa que estableceu amizade.
A sentenza, datada o 26 de outubro e divulgada este luns polas autoridades xudiciais, establece, ademais dos doce anos de reclusión, outros sete anos de liberdade vixiada e outros dezasete de inhabilitación para exercer calquera profesión ou oficio de contacto regular e directo con menores, e a prohibición de aproximarse e de comunicarse coa vítima durante dezanove anos. O home condenado tamén deberá indemnizar á vítima dos abusos con 30.000 euros, segundo a sentenza da sección segunda da Audiencia Provincial da Coruña.
O ditame indica que o home iniciou unha relación de amizade cunha muller estranxeira en Ferrol en 2007, cando ela se instalou a vivir en España. Desde entón, "axudáballe economicamente no sostemento dos seus fillos e asumiu un papel familiar no coidado" da menor, nacida en 2001, que o chamaba "avó", e á que acompañaba a citas médicas ou a cursos musicais, co que logrou "ter moitísima influencia sobre ela", indica a sentenza.
Arredor de 2010, cando a menor tiña 9 anos, "aproveitando o contacto ordinario e a familiaridade que representaba, tras gañar a vontade da nena", o home logrou que "participase en escenarios de carácter sexual", empezando con "bicos na boca" ata "penetrala vaxinal e analmente". Ese comportamento, que se repetiu "con frecuencia" ata a denuncia ás autoridades en 2017, levou a Audiencia a condenalo a 12 anos de cárcere como autor responsable dun delito continuado de abuso sexual sobre menor de 16 anos, aínda que a sentenza non é firme e contra ela cabe recurso de apelación ante o Tribunal Superior de Xustiza de Galicia.