Paro total nos estaleiros de Navantia para demandar avances na negociación do convenio

Paro absoluto nos dous estaleiros que a empresa naval pública Navantia ten na ría de Ferrol. Desde as dez da noite deste mércores, 20 de novembro, e ata esa mesma hora deste xoves, os operarios públicos de Ferrol e Fene están a secundar un acto de protesta de 24 horas, do mesmo xeito que no resto de centros de traballo.

Segundo o presidente do comité de empresa de Navantia Ferrol, Carlos Díaz (MAIS), "o paro é total" e só acudiron ao complexo industrial os servizos mínimos. Ademais, instaláronse piquetes informativos nas portas, nunha xornada que transcorre "sen incidentes".

Esta medida de protesta foi aprobada o luns, 18 de novembro, nunha asemblea, e foi cambiada por unha concentración que tiñan prevista celebrar este xoves en Madrid, ante o Ministerio de Facenda, para tratar de desbloquear a negociación de convenio colectivo, unha medida de protesta que foi rexeitada.

"Esperamos mover a negociación coa dirección e que se avance isto dunha vez por todas co texto definitivo", detallou Díaz.

Paralízanse os traballos en aceiros da construción das fragatas F-110 

Por outra banda, os operarios de Navantia Ferrol aprobaron este mércores paralizar os traballos en aceiros na construción da novas fragata F-110. Foi mediante un referendo con voto en urna e en contra do criterio da maioría do comité de empresa. A medida estará vixente ata que non se asine o convenio colectivo. 

Carlos Díaz lembrou que foi este luns cando o sindicato CXT propuxo esta medida de paralización de traballos durante unha asemblea xeral, e que este resultado "teñen que facer pensar á dirección, xa que é moito tempo con negociacións, máis de dous anos".

Di ademais Díaz que esta é unha medida que non comparte a maioría do comité, "porque afectará á industria auxiliar", e que son ademais "o único estaleiro de todo o grupo que van paralizar a actividade".

Por outra banda, desde o sindicato CXT, o seu portavoz Javier Losada, asegurou que "o comité de empresa está de costas ao que quere o persoal, sobre todo a novas incorporacións" e traslada que a paralización dos traballos en aceiros "é para mostrar o seu rexeitamento tanto á dirección da empresa, como ao Goberno", xa que este é o único accionista.

Asegura Javier Losada que o persoal "está a sufrir desde o anterior convenio un empobrecemento, algo que agora mesmo queren apontoar".