Investigan un gandeiro de Chantada pola morte de varias reses
Investigan un gandeiro de Chantada pola morte de varias reses
Atopáronse tamén animais con síntomas de enfermidade e desnutrición
A inspección foi realizada pola Garda Civil e veterinarios de Medio Rural/Garda Civil
A Garda Civil investiga un gandeiro de Chantada (Lugo), de 50 anos de idade, como presunto autor dun delito de malos tratos animais. A súa explotación gandeira posuía graves deficiencias en termos hixiénico-sanitarios e varios animais atopábanse en mal estado de saúde, chegando a graos de enfermidade e desnutrición.
Segundo informaron fontes da Comandancia, nunha inspección realizada por axentes da Garda Civil e por veterinarios da Consellería do Medio Rural púidose constatar a existencia de graves deficiencias nesta explotación. Atopáronse cinco reses en estado de desnutrición e con perda de músculo e graxa. Dúas delas estaban prostradas e moi enfermas, ata o punto que houbo que practicarlles a eutanasia para evitarlles sufrimentos innecesarios. Investígase tamén se o pasado mes faleceron nestas instalacións outras cinco reses sen recibir ningún tipo de tratamento veterinario.
