Consumo investiga varias inmobiliarias por cobrar comisións a inquilinos por alugar

O Ministerio de Dereitos Sociais, Consumo e Axenda 2030 abriu unha investigación a varias empresas de xestión do alugueiro de vivendas que obrigarían os inquilinos a pagar unha comisión pola xestión do arrendamento ou a asinar contratos temporais sen que a temporalidade estivese xustificada.

Serían, segundo puido constatar Consumo, varias empresas que operan en todo o estado, cometerían prácticas abusivas contra consumidores na xestión do alugueiro. Algunhas como as citadas, pero tamén outras cláusulas abusivas que incluían para os inquilinos.

A Dirección Xeral de Consumo abriu esta investigación formalmente tras ter coñecemento destas prácticas a través de diversas denuncias presentadas por asociacións de consumidores.

O Ministerio que dirixe Pablo Bustinduy quere deixar claro que "trasladar aos inquilinos os gastos de xestión inmobiliaria e de formalización do contrato é unha práctica prohibida" expresamente pola lei polo dereito á vivenda do pasado ano, do mesmo xeito que a firma de contratos temporais nos que a temporalidade non estea xustificada.

Lembra tamén ás empresas que a vivenda é un dereito e un ben de primeira necesidade amparado pola lei de arrendamentos urbanos, unha normativa que impide ás axencias inmobiliarias incluír cláusulas ou prácticas que atenten contra os dereitos que teñen os inquilinos.

Ademais estas prácticas poderían supoñer un abuso segundo a lei de defensa dos consumidores.

Por unha banda, o incumprimento das normas reguladoras de prezos, a imposición inxustificada de condicións sobre prestacións non solicitadas, e o uso de prácticas comerciais desleais con consumidores ou usuarios poderían cualificarse como graves e ser sancionadas con multas de ata 100.000 euros.

E poderíase exceder esas cantidades ata alcanzar entre catro e seis veces o beneficio ilícito obtido.

Por outra, a introdución ou existencia de cláusulas abusivas nos contratos, unha terceira infracción, podería considerarse moi grave e ser sancionada con multas ata un millón de euros, e poderíase tamén exceder esas cantidades ata alcanzar entre seis e oito veces o beneficio ilícito obtido.

Estas prácticas enmarcaríanse dentro doutras que son contrarias ás normas vixentes, como esixir a inquilinos e inquilinas o pago de fianzas desproporcionadas, que asuman garantías adicionais ou que teñan que pagar mensualidades adiantadas.