Continúan na costa galega as candorcas avistadas no mes de setembro

No instituto de investigacións mariñas do Grove téñeno claro. O grupo de oito candorcas que teñen identificado e que avistaron na costa galega durante todo o mes de setembro, segue aquí, na zona das rías baixas.
 

"Nós as avistamos nos baixos de Corrubedo e a semana pasada avistáronas na mesma zona e tamén á altura das illas Ons temos unha notificación e tamén en Fisterra".
 

Téñenos identificados pola aleta dorsal e pola coloración corporal. Son oito animais, sete femias de distintas idades e un macho adulto. E cren que a súa presenza na costa galega está relacionada co seu alimento principal, o atún.
 

"Todo apunta ao que levamos estudando en relación ao atún vermello. O atún é o seu alimento principal e por iso temos previsto que ata ben entrado outubro non emigrarán cara ao sur da península Ibérica e mesmo ao norte de África".

Nun día poden percorrer un radio de 80 quilómetros. O último tropezo cunha embarcación tivérono hai tres días na zona de Ons. Bateron co temón dun barco de vela, sen causarlle danos. O patrón abandonou a zona, tal e como se aconsella facer nestes casos.