Dez anos de cárcere para un home que abusou de maneira continuada da neta da súa parella
O tribunal explica que este home, "movido pola intención de satisfacer os seus desexos", e aproveitando que a menor convivía coa súa avoa e con el, ademais de con os seus pais e irmáns, realizoulle de maneira continuada actos de contido sexual
Audiencia provincial da Coruña
A Audiencia de Pontevedra condenou a dez anos de cárcere un home que abusou sexualmente da neta da súa parella, episodios que se repetiron desde que a nena tiña sete anos ata que fixo os doce.
O acusado, que foi condenado como autor dun delito continuado de abusos sexuais con penetración a menor de dezaseis anos, deberá aboar 60.000 euros á vítima polos danos morais ocasionados.
Tras a súa saída de prisión deberá pasar outros dez anos en liberdade vixiada e non poderá achegarse a menos de 500 metros da vítima nin comunicarse con ela durante vinte anos.
Ademais, a sentenza inhabilítao durante vinte anos para exercer calquera profesión ou oficio, sexa ou non retribuído, que implique contacto regular e directo con persoas menores de idade.
O tribunal explica que este home, "movido pola intención de satisfacer os seus desexos", e aproveitando que a menor convivía coa súa avoa e con el, ademais de cos seus pais e irmáns, realizoulle de maneira continuada actos de contido sexual.
Estes episodios, segundo consta no relato de feitos probados, ocorreron no dormitorio da nena, na habitación do acusado, na cociña da casa e no lugar onde gardaban as cabras, aproveitando os momentos en que non había ninguén máis en casa.
O acusado sempre lle dicía á nena que non podía contar nada do sucedido a ninguén e só deixou de facelo cando a menor, xa con doce anos, insistiulle en que se continuaba realizándolle tocamentos, íallo dicir aos seus pais.
A nai da vítima denunciou os abusos meses despois de que estes terminasen.
Os feitos foron confirmados ante a o tribunal polo propio acusado, a quen os netos da súa parella trataban como o seu avó, e os maxistrados tamén destacaron a credibilidade do testemuño da vítima, un relato que foi corroborado polos informes psicolóxicos.
Neles recóllese que a declaración da menor contén "criterios de contido suficientes" para establecer que o relatado "é propio dunha memoria baseada en feitos vividos".
A pesar da confesión do acusado, esta sentenza non é firme e pode ser recorrida ante o Tribunal Superior de Xustiza de Galicia.
