A fiscala destaca o poder de Rubiales: "Unha xogadora enfrontada a un presidente que o mandaba todo"

"Non houbo consentimento, non houbo pregunta, non houbo resposta. Foi sorpresivo, inesperado e sen posibilidade de reacción da vítima". Para a fiscala Marta Durántez non hai dúbida de que o bico de Luis Rubiales a Jennifer Hermoso foi unha agresión sexual.

A Fiscalía pediu condenar ao expresidente da Real Federación Española de Fútbol ao considerar que "o bico que lle deu na boca" á futbolista Jennifer Hermoso "foi non consentido" e destacando como "unha simple xogadora" tivo que enfrontarse a un dirixente "que mandaba todo", e non dubidou de que os outros tres exdirectivos acusados coaccionaron a Jenni Hermoso para que dixese que o bico que lle deu foi consentido, porque "se el caía, caían os demais". 

Durante as súas conclusións a fiscala alzou a voz contra a "revitimización" de Jenni Hermoso no xuízo onde ela mesma viuse obrigada a preguntar por que riu tras o triunfo, e preguntou: "É menos vítima por iso?".

"Ata cando imos estar esixindo á vítima dunha agresión sexual un comportamento heroico? (...) Que lle podemos esixir que faga? Que se vaia a un recuncho para chorar? Que monte un espectáculo?", preguntou na recta final do proceso.

A fiscal, que mantivo a súa petición de dous anos e medio de prisión para Rubiales, defendeu que, tras sete xornadas de xuízo, "non hai xénero de dúbida ou polo menos dúbida razoable suficiente" de que o bico que deu a Jenni Hermoso tras a vitoria do Mundial "foi un bico non consentido".

E esa actuación encaixa "como unha luva" nun delito de agresión sexual, asegurou, botando man da xurisprudencia para tentar acreditalo, como unha sentenza que, tras condenar por este delito, deixou claro que un "bico roubado" atenta contra a liberdade da muller de decidir con quen debe bicarse.

Non existe un dereito dunha persoa para achegarse a outra e darlle un bico sen o seu consentimento "nin como proba de agarimo nin como mostra de afecto", dixo a fiscal ao ler a sentenza, "moitas" das que existen -recalcou-.

A fiscala, que quixo deixar claro desde un primeiro momento que nunca induciu a Jenni Hermoso a denunciar, aseverou que "estamos ante unha simple xogadora enfrontada contra unha Federación de Fútbol cun poder que xa vimos".

"E cun presidente que non é que mandase moito, é que mandaba todo", apuntou, e precisou que a pena que pide é a mínima.

Jenni Hermoso tivo, segundo a fiscala, "toda unha maquinaria da Federación contra ela, chamándolle mentireira, tratando de desacreditala de todas as formas posibles", cuns acusados "dispostos a facer o que faga falta" por arranxar a situación, para conseguir "a toda cousa" o que querían.

A fiscal subliñou a dependencia xerárquica que os tres exdirectivos tiñan respecto a Rubiales, con quen "fixo carreira" na Federación, e por iso pretenderon obrigar a Jenni Hermoso a facer o que non quería, dixo.

"Así é como actuaba o señor Rubiales", indicou ao describir unha "situación de poder absoluto e omnímodo". "Aplicouse unha absoluta omertá. Ninguén podía falar, ninguén podía contradicir, alí poñíase e dicíase o que o señor Rubiales quería", engadiu.

E tamén destacou o "desnivel xerárquico" con respecto a Hermoso: unha xogadora fronte a altos cargos da Federación. Ela, dixo, acababa de ser "vítima dunha agresión sexual e preténdese facer ver que as cousas non son como ela pensaba que eran".

Aínda que, segundo a xurisprudencia, non é necesaria a violencia para que se dea un delito de coaccións, Durántez defendeu que "claro que houbo, violencia psíquica e moita".

Durántez pechou case dúas horas de informe pedindo ao xuíz aplicar unha lei "clara" ante unha "verdade material" e acudindo ao Sinceramente tuyo de Joan Manuel Serrat para resolver: "Nunca é triste a verdade. O que non ten é remedio".